Sulmuesi i Barcelonës, Robert Lewandowski, ka kaluar disa ditë të ngarkuara, pas dorëheqjes së tij nga Kombëtarja e Polonisë, që erdhi si pasojë e një përplasjeje me trajnerin Michal Probierz dhe heqjes së shiritit të kapitenit. 36-vjeçari është kthyer këtë javë në vendlindje për t’u paraqitur në gjykatë.
Sipas raportimeve të Sport.PL, të përcjella nga gazeta Sport në Katalonjë, Lewandowski është paraqitur të mërkurën në gjykatën e Varshavës, lidhur me një mosmarrëveshje me ish-partnerin e tij të biznesit dhe ish-agjentin, Cezary Kucharski, rreth shitjes së aksioneve në kompaninë “RL Management”.
Kucharski priste të merrte një komision të konsiderueshëm nga shitja e aksioneve, ndërkohë që Lewandowski e ka akuzuar atë për shantazh – çështje kjo që po shqyrtohet aktualisht në gjykatat polake. Një pjesë e provave përfshin një incizim 3.5 orësh ku të dy diskutonin për këtë çështje. Në incizim, Kucharski e akuzon Lewandowskin për mashtrim financiar, ndërsa Lewandowski sugjeron se Kucharski është i përfshirë në pastrim parash. Edhe bashkëshortja e tij, Anna Lewandowska, pritet të dëshmojë në gjykatë.
Trajneri Michal Probierz ia hoqi Lewandowskit shiritin e kapitenit fundjavën e kaluar, duke deklaruar se kjo ishte një vendim i mbështetur nga ekipi dhe stafi, të cilët ndihen se 36-vjeçari ka ndikuar negativisht në ambientin brenda dhomave të zhveshjes.
Nga ana tjetër, Federata Polake e Futbollit është distancuar nga ky vendim, duke thënë se ishte një veprim i ndërmarrë vetëm nga Probierz. Presidenti i Federatës ka deklaruar se është i gatshëm të ndërmjetësojë mes tyre. Megjithatë, në një intervistë të dhënë së fundmi, Lewandowski ka theksuar se nuk është njeri që mban inate, por disa veprime të Probierz-it “do të jenë të vështira për t’u harruar”.
Pozita e trajnerit Probierz është vështirësuar edhe më shumë pas humbjes 2-1 nga Finlanda këtë javë në Helsinki, që i lë polakët në ndjekje në grupin kualifikues për Kupën e Botës. Aktualisht janë një pikë prapa finlandezëve, megjithëse kanë një ndeshje më pak të zhvilluar, ndërsa Holanda ka po aq pikë sa Polonia, por edhe ajo ka një ndeshje në dorë. Probierz pritet të sigurojë të paktën një vend në fazën “play-off” para Finlandës.
Kriza te Polonia: Lewandowski dorëhiqet, përplasje me trajnerin dhe betejë në gjykatë / shkruan Gazeta Online Reporteri.net.
