Kombëtarja e Kosovës luan kundër Lituanisë në stadiumin “Fadil Vokrri” dhe është ndeshja e fundit për vitin 2024 në kompeticionin UEFA Nations League.
Amir Rrahmani dhe Lumbardh Devolla do të mungojnë sonte në këtë përballje.
Një mungesë tjetër për sonte është edhe portieri, Amir Saipi, i cili dje e ka lënë grumbullimin dhe vendin e tij e ka zënë Ilir Avdyli.
Kjo ndeshje luhet nga ora 20:45.
Kosova tashmë ka 9 pikë dhe një ndeshje që do të vendoset nga komisionet e UEFA-s, ndërsa rruga për në Ligën B te Kombeve mbetet e hapur.
Dardanët kanë humbur ndeshjen e parë në “Fadil Vokrri” ndaj Rumanisë me rezultat 3-0, ndërsa që atëherë nuk di për humbje.
Dy fitore ndaj Qipros, një fitore ndaj Lituanisë, pastaj barazimi 0-0 deri në minutën e 90-të ndaj Rumanisë, janë rezultatet e Franco Fodas në këtë edicion.
Ndeshja e radhës dhe e fundit është ajo mes Kosovës dhe Litanisë që zhvillohet në “Fadil Vokrri”, por Dardanët tashmë e kanë siguruar pozitën e dytë.
Fitorja do i bënte mire ekipit për ecurinë dhe besimin, ndërsa do të ishte në pritje të vendimit të komisioneve disiplinore.
Nëse Kosova mbetet në vend të dytë, këta janë kundërshtarët e mundshëm të play-offit
Në rastin e parë, nga Grupi 1, mund të ketë një përballje me Kosovës dhe Shqipërisë, në rast se Shqipëria nuk arrin të fitojë ndaj Ukrainës në shtëpi dhe ndeshja mes Çekisë dhe Gjeorgjisë përfundon baras.
Irlanda është një kundërshtar tashmë i caktuar, pasi ka siguruar vendin e tretë në grupin 2 të Ligës B të Kombeve.
Në grupin 3, Sllovenia është kundërshtari i mundshëm, pasi mban vendin e tretë me 8 pikë, tri më pak se Austria.
Nga grupi i 4-të i Ligës B të Kombeve, Kosova mund të luajë ndaj Uellsit ose Islandës, të cilët kanë një ndeshje direkt për vendin e dytë dhe të tretë. Fitorja dhe barazimi i mjafton Uellsit që është vendas të zërë vendin e dytë.
Shorti për play-off-in e promovimit dhe rënies do të hidhet më 22 nëntor 2024 nga ora 12:00, në selinë e UEFA-s në Nyon të Zvicrës.
Kosova sonte pret fitore kundër Lituanisë në stadiumin “Fadil Vokrri” / shkruan Gazeta Online Reporteri.net.
