Massimiliano Allegri, i ka lavdëruar dy përforcimet e reja Luka Modriqin dhe Ardon Jasharin.
Klubi italian Milan, është përballur me Leeds Unitedin, në një miqësore e cila përfundoi baras.
Në këtë ndeshje debutoi edhe futbollisti me prejardhje shqiptare, Ardon Jashari, i cili u transferua nga Club Brugge për 37 milionë euro, që po konsiderohet si transferi më shtrenjtë deri më tani në këtë afat kalimtar të Serie A.
Ai formoi treshen e mesfushës së bashku me Yunus Musah dhe 17-vjeçarin Emanuele Sala.
Nga ana tjetër, kroati Modriq, i cili pati një pushim të zgjatur veror, nuk u aktivizua, duke qëndruar në stol gjatë gjithë ndeshjes.
Allegri u shpreh i impresionuar nga Jashari, sidomos duke marrë parasysh se pjesën më të madhe të përgatitjeve verore e kishte kaluar duke u stërvitur individualisht te Club Brugge.
“Ata janë lojtarë të shkëlqyer me inteligjencë dhe përulësi,” tha Allegri.
“Për të qëndruar në nivele të larta, duhet të jesh i zgjuar. Modric, dhe nuk është e lehtë për mua ta them këtë, është një lojtar i jashtëzakonshëm. Ndërsa Jashari më mahniti me mënyrën si ia doli, edhe pse nuk kishte punuar shumë me topin dhe pothuajse gjithmonë stërvitej vetëm”, theksoi ai.
Strategu italian shtoi se ende ka vend për përmirësim.
“Ka punë për të bërë, si në aspektin fizik ashtu edhe në bindjen mendore. Nuk duhet të entuziazmohemi shumë, sepse për Milanin duhet të jetë normalitet të fitojë ndeshje”, tha ndër të tjera Massimiliano Allegri.
Debutimi i Jasharit pozitiv, Allegri ka fjalë të mira për të / shkruan Gazeta Online Reporteri.net.
