Për fat të mirë gjendja nuk është aq serioze. Armando Broja ka një dëmtim relativisht të lehtë, siç konfirmon stafi mjekësor i Evertonit, dhe sulmuesi nuk pritet të mungojë gjatë.
Ylli i kombëtares shqiptare doli nga fusha shumë shpejt në ndeshjen e kaluar të Premier Ligës angleze, që Everton e humbi 0-1 në fushën e Bournemouthit.
Frika ishte e madhe për një futbollist që ka vuajtur shumë nga lëndimet, dhe që ishte kthyer vetëm pak kohë më parë në terren, ndërsa kishte munguar gjatë.
Sidoqoftë, ai ka vetëm një goditje të fortë në shpinë, dhe pritet që t’i kalojë shpejt problemet e të kthehet në stërvitje me skuadrën.
Broja, i huazuar këtë sezon nga Chelsea, nuk luajti asnjë ndeshje deri në 4 dhjetor kur u aktivizua për 7 minuta. Më pas, luajti kundër Arsenalit e sidomos u dallua për kontributin ndaj Manchester Cityt.
Në dy ndeshjet e fundit, trajneri Sean Dyche e zgjodhi titullar, derisa Armando u dëmtua, përcjell abcnews.
Vetë trajneri është në prag të shkarkimit pasi ekipit është pranë zonës së rënie nga kategoria, ndërsa tifozët duket se janë mërzitur me lëndimet e shpejta të shqiptarit, e disa prej tyre kërkojnë që ai të kthehet tek Chelsea.
Sidoqoftë, më parë pritet që Broja të kthehet në fushë, e kjo mund të ndodhë fundjavën e ardhshme, ose pas dy javësh.
Broja do të kthehet shpejt, e ka vetëm një problem në shpinë / shkruan Gazeta Online Reporteri.net.
