Të premten e 14 marsit, përzgjedhësi i Kosovës, Franco Foda çuditi të gjithë me përfshirjen e një emri në listën e kombëtares dardane për muajin mars.
Mes yjeve të shumta të Kosovës, që jemi mësuar t’i shohim, aty figuronte edhe emri i Lirjon Abdullahut, 16-vjeçar.
Ai është lojtari i dytë më i ri që është ftuar nga Kosova A, që nga Labinot Kabashi në tetor të vitit 2016.
Abdullahu luan te Stuttgarter Kickers U17, derisa disa ditë para grumbullimit me “Dardanët”, ai e nënshkroi kontratën e tij të parë profesionale në karrierë, me ekipin e parë të Stuttgarter Kickers.
16-vjeçari sot është paraqitur për herë të parë në stërvitje me kombëtaren e Kosovës.
Ai ka folur për faqen zyrtare të Federatës së Futbollit të Kosovës, duke e cilësuar si ndjenjë spektakolare ftesën e marrë nga Kosova për ndeshjet e marsit.
“Është një ndjenjë shumë e mirë, unë këtë ftesë as nuk e kam pritur, si 16-vjeçar as nuk e kam pritur fare këtë ftesë. Jam shumë i kënaqur edhe me vetën që ma kanë dhënë këtë mundësi. Me kallxu vetën në kombëtaren A është një ndeshje shumë e mirë, spektakolare. As këtij s’e kanë pritë që një 16-vjeçar vjen te Kosova A, i falëndëroj të gjithë lojtarët për mikpritjen deri më tash. Dua t’i tregoj të gjithëve kush jam, çka di e qysh luaj futboll”, ka thënë Abdullahu për FFK-në.
Kosova do të luajë dy ndeshje gjatë muajit mars, të dyja në kuadër të play-offit për Ligën B të Ligës së Kombeve.
Kombëtarja dardane do t’i bëj konak Islandës më 20 mars në “Fadil Vokrri”, derisa më 23 mars do të luhet ndeshja e kthimit në Spanjë.
Abdullahu në kombëtare: S’e kam pritur ftesën, as lojtarët kurrë s’kanë besuar që iu bashkohet një 16-vjeçar / shkruan Gazeta Online Reporteri.net.
