Ish kreu i PD Lulzim Basha ka dalë nga ambientet e SPAK, ku është pyetur nga prokurori Alfred Shehu për ngjarjen e 21 janarit, ku u vranë 4 veta në Bulevard.
Basha, në një prononcim për mediat, nuk ka pranuar të tregojë detaje, duke thënë se do ruaj sekretin hetimor dhe deklaroi gjithçka që dinte, gjatë kohës që ai ka mbajtur postin e ministrit të Brendshëm.
“Duhet të ruaj sekretin hetimor. Jam thirrur si person që ka dijeni për një çështje që kam dijeni, informacionin merreni te SPAK. Konferencën për shtyp njëherë tjetër.”, tha Basha.
Kujtojmë se vendimi i Gjykatës së Strasburgut që e quajti “krim shtetëror” ngjarjen e 21 janarit, i hapi rrugë hetimeve nga SPAK, duke regjistruar procedimin penal me datë 15 korrik 2024, edhe pas një vendimi të Gjykatës së Lartë, për 3 vepra penale “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim. Tashmë SPAK, ka dosjen në dorë të zbardhë rolin e ish-kryeministrit Sali Berisha, ish-ministrit të Brendshëm Lulzim Bashës, ish-kreut të Gardës Ndrea Prendit e të tjerëve në vrasjen e 4 qytetarëve të pafajshëm.
Familjarët e 4 viktimave, Ziver Veizi, Aleks Nika, Hekuran Deda dhe Faik Myrtaj kërkojnë të dënohen urdhëruesit dhe zbatuesit e kësaj vrasje shtetërore në mes të ditës, në mes të bulevardit përpara Kryeministrisë 14 vite më parë./vizionplus.tv
