56-vjeçari Mikel Ndoi është në burg nga gjykata e Durrësit.
Dy ditë më parë ai plagosi me thikë vajzën e tij tij 24-vjeçare, si edhe një koleg të saj që tentoi ta mbronte. Gjatë seancës gjyqësore për vlerësimin e masës së sigurisë ai ka mohuar akuzat, duke deklaruar se është i pafajshëm dhe duke kërkuar lirimin e menjëhershëm.
“Jam i pafajshëm, kërkoj të lirohem menjëherë”.
Nga ana tjetër, gjykata vlerësoi të ligjshëm arrestimin e kryer nga policia dhe vendosi mbajtjen e tij në burg. Sipas hetimeve, Mikel Ndoi ishte divorcuar prej afro 6 vitesh. Pas ndarjes, 56-vjeçari ishte larguar drejt Italisë, ku edhe kishte vuajtur dënim me burg.
Pas rikthimit në Shqipëri, ai nuk ishte pranuar më nga familja. Kjo situatë ka çuar në konfliktin e fundit, ku babai i është drejtuar vendit të punës së vajzës, të cilën e ka plagosur me thikë në rrugë.
Vendimi i Gjykatë së Durrësit:
1. Vleftësimin e ligjshëm të arrestit në flagrancë, të personit nën hetim M.N., i dyshuar për kryerjen e veprave penale “Vrasja me dashje”, e mbetur në tentativë, “Vrasja për shkak të marrëdhënieve familjare”, e mbetur në tentativë dhe “Prodhimi, mbajtja, blerja apo shitja pa leje e armeve te ftohta”, të parashikuara nga nenet 76 dhe 22, 79/c dhe 22, si dhe 279, paragrafi 2 i Kodi Penal të Republikës së Shqipërisë.
2. Caktimin ndaj personit nën hetim M.N, të masës së sigurimit personal “arrest në burg”, të parashikuar nga neni 238 i Kodit të Procedurës Penale.
3. Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Durrës në bashkëpunim me policinë gjyqësore për ekzekutimin e këtij vendimi.
4. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e komunikimit të vendimit të arsyetuar të gjykatës.
U shpall në Durrës, sot më datë 28.1.2026.
