Nicola Loro 19 vjeç, me origjinë nga Italia humbi jetën në spitalin e Shkodrës, pas përplasjes së dy Jet Ski-ve në plazhin e Velipojës.
Loro kishte ardhur për pushime me të dashurën e tij dhe vëllanë e të dashurës. Ky i fundit u arrestua nga policia e Shkodrës për “vrasje nga pakujdesia”.
Lidhur me tragjedinë ka folur e dashura e 19-vjeçarit, Giusy Di Tella, njëkohësisht dhe motra e të arrestuarit, Salvatore Di Tella, e cila thekson se ata nuk ishin as nën efektin e alkoolit dhe as të drogës.
“Ishte thjesht një aksident tragjik”, deklaroi ajo për Ansa.
“Autoritetet shqiptare kanë dhënë leje që ne të marrim trupin e të dashurit tim dhe po përgatitemi të kthehemi në Itali, por dua të theksoj fort se ishte thjesht një aksident tragjik, një përplasje e papritur; ne nuk kishim pirë alkool dhe as drogë. Unë, i dashuri im dhe vëllai im ishim shumë të lidhur. Ata të dy ishin si vëllezër”, thotë vajza e përlotur.
Nicola ishte me familjen e të dashurës së tij që kishte ardhur në Shqipëri për një dasmë. Tragjedia ka ndodhur të dielën. Nicola dhe Salvatore vendosën të merrnin dy Jet Ski. Më pas ata u përplasën në detin e Velipojës.
Giusy ishte dëshmitare e tragjedisë. Ajo ishte me të dashurin e saj në njërin prej Jet Ski-ve që u përfshi në aksident.
Pas përplasjes, shpjegon Giusy, “vëllai im u hodh në ujë për të ndihmuar Nicolën, ai e nxori nga uji dhe u dërgua menjëherë në spital ku fatkeqësisht vdiq”.
Policia e Shkodrës ndaloi Salvatore Di Tella-n, i cili akuzohet për “vrasje nga pakujdesia”.
Sipas policisë përplasja është shkaktuar nga “manovrat e rrezikshme dhe të pasakta” të kryera “një milje nga perimetri i sigurisë”./vizionplus.tv
