Drejtori i Përgjithshëm i Policisë së Shtetit, Muhamet Rrumbullaku, në një deklaratë për shtyp ka bërë me dije se është mbyllur faza e parë e aplikimeve për Akademinë e Sigurisë.
Ai shprehet se është treguar një interes shumë i madh nga të rinjtë e vendit tonë.
Më tej, ai thekson se djemtë dhe vajzat që kanë aplikuar do t’i nënshtrohen një procesi seleksionimi, në mënyrë për të zgjedhur 100 më të mirët, të cilët do të nisin studimet në vitin akademik 2024-2025.
DEKLARATË PËR SHTYP
Drejtorit të Përgjithshëm të Policisë së Shtetit,
Drejtues Madhor Muhamet Rrumbullaku mbi aplikimet në Akademinë e Sigurisë
Mbyllja e fazës së parë të aplikimeve për ndjekjen e studimeve të larta dëshmoi një interes të madh të të rinjve dhe të rejave për të ndjekur Fakultetin e Sigurisë dhe Hetimit të Akademisë së Sigurisë. I organizuar për herë të parë në portalin “UAlbania”, procesi i pranimit në Akademinë e Sigurisë, si starti i një rruge të rëndësishme për të qenë pjesë e Policisë së Shtetit, dëshmoi shkallën e lartë të besimit të publikut në punën tonë të përditshme.
Në emër të Policisë së Shtetit, dua të garantoj vajzat dhe djemtë që zgjodhën të aplikojnë për t’u bashkuar me uniformën e shenjtë të Policisë së Shtetit se, do t’i nënshtrohen një procesi seleksionimi ligjor e transparent, bazuar në shanset e barabarta dhe mosdiskriminimin, për të zgjedhur mes jush 100 më të mirët, të cilët do të nisin studimet në vitin akademik 2024-2025.
Në këtë kuadër, Akademia e Sigurisë, e akredituar si institucion i arsimit të lartë, me dy njësitë kryesore të saj Fakultetin e Sigurisë e Hetimit dhe Kolegjin Profesional të Formimit Policor, ofron programe cilësore dhe staf të kualifikuar mësimdhënës. /vizionplus.tv
