Daniel Qose 33 vjeç dhe David Larti 30 vjeç janë dy të rinjtë nga Korça që u arrestuan ditën e sotme nga policia e Himarës.
Në një njoftim për mediat, policia bëri me dije se Qose dhe Larti ishin punonjës të hotelit në Dhërmi, ku Gerald Shehu vrau Eraldo Nevruzin.
Dy të rinjtë nga Korça, sipas bluve, kanë ndihmuar Shehun që të fshehë trupin e viktimës.
“Nga veprimet hetimore të kryera për zbardhjen e plotë të ngjarjes, dyshohet se autori, shtetasi G. Sh., pasi e ka vrarë me armë zjarri shtetasin E. N., është ndihmuar për të fshehur trupin, nga 2 punonjës të hotelit të tij, shtetasit D. Q., 33 vjeç dhe D. L., 30 vjeç, të dy banues në Korçë”, thuhet në njoftimin e policisë.
Trupi i Eraldo Nevruzit ende nuk është gjetur, ndërsa policia po kërkon në rrugë tokësore dhe me dron në disa pika.
Kontrolle ka pasur në aksin Dhërmi -Himarë, por edhe në zona të tjera të dyshimta që mund ta ketë hedhur trupin. Mësohet se gjithashtu janë kontrrolluar edhe kanale apo zonat ku kalon makina në Gjipe, Vuno, Ilias, si dhe nga deti me policinë kufitare e cila bashkëpunon me drejtorinë e policisë së Vlorës./vizionplus.tv
