Një anëtar i stafit të serialit të njohur “Emily in Paris” ka humbur jetën papritur gjatë xhirimeve të sezonit të pestë në Venecia.
Sipas La Repubblica, bëhet fjalë për Diego Borella, 47 vjeç, i cili punonte si asistent regjisor në produksion. Ai u rrëzua papritur para kolegëve të tij ndërsa po përgatitej një skenë në Hotel Danieli, rreth orës 19:00 me orën lokale të enjten.
Stafi mjekësor i serialit u përpoq t’i jepte ndihmën e parë, por nuk arriti ta shpëtonte. Ekipet e urgjencës, të thirrura menjëherë në vendngjarje, konfirmuan vdekjen në hotel.
Në një deklaratë për BBC News, kompania Paramount Television Studios, e cila prodhon serialin për Netflix, shprehu ngushëllimet e saj:
“Jemi thellësisht të pikëlluar që konfirmojmë ndarjen e papritur nga jeta të një anëtari të familjes së produksionit Emily in Paris. Zemrat tona janë me familjen dhe të dashurit e tij në këtë periudhë jashtëzakonisht të vështirë.”
Xhirimet e serialit u pezulluan përkohësisht pas ngjarjes tragjike.
Vdes asistenti i regjisorit të “Emily in Paris” gjatë xhirimeve në Venecia / shkruan Gazeta Online Reporteri.net.
