Mjekët thonë se një teknologji e re mund të përmirësojë jetën e pacientëve që vuajnë nga Parkinson.
Teknologjia e re mund të gjurmojë me saktësi aktivitetin e trurit të pacientit dhe të dërgojë në kohë reale stimulimin elektrik të nevojshëm për të ndaluar lëvizjet dhe dridhjet e pavullnetshme.
Eric van Breda nga Roterdami është ndër pacientët e parë me Parkinson që provoi pajisjen e re të stimulimit të vendosur brenda trurit.
“Filloi me vështirësinë për të shtypur në kompjuter dhe duke qenë se gruaja ime është neurologe, shumë shpejt zbuluam se ishte sëmundja e Parkinsonit. Shkova tek një neurolog, bëra një skaner dhe e mora diagnozën brenda dy javëve. Në vazhdim u rrënua e gjithë jeta ime”, thotë Van Breda.
Sëmundja e Parkinsonit shkaktohet nga humbja e qelizave nervore në tru. Janë këto qeliza që prodhojnë dopaminën, e cila vepron si një ndërmjetëse mes trurit dhe sistemit nervor, që ndihmon në kontrollin dhe koordinimin e lëvizjeve të trupit.
Kur qelizat vdesin, pacientët bëhen gjithnjë e më të paaftë për të kontrolluar lëvizjet e tyre. Përveç dridhjeve dhe problemeve të ekuilibrit, pacientët mund të kenë gjithashtu dhimbje nervore, marrje mendsh dhe probleme me gëlltitjen.
Në total janë 108 pacientët që janë pjesë e një programi pilot, të cilëve u është vendosur tashmë brenda trurit pajisja me një version tjetër të programit për stimulimin e thellë të trurit.
Teknologjia ka ekzistuar prej tre dekadash./tiranapost/
Një teknologji e re ndalon dridhjet e pacientëve me Parkinson / shkruan Gazeta Online Reporteri.net.