Drejtori i Agjencisë për Inteligjencë, Erold Musliu, ka hedh poshtë akuzat e paraqitura në një konferencë për shtyp nga deputeti i OBRM-PDUKM-së, Dragan Kovaçki, i cili e akuzoi të parin e Kundërzbulimit për ndikim mbi qeverinë.
Musliu thotë se kjo i shkakton dëme të mëdha si qytetar besnik i RMV-së dhe profesionist i përkushtuar me karrierë 31-vjeçare.
“Kjo i bëhet me qëllim gruas sime që punon 23 vjet në sektorin joqeveritare për të dëmtuar aktivitetet e saj, ndërsa fëmijët tanë i vendosin në rrezik duke shpërndarë informacione të pavërteta për prindërit e tyre”, thuhet në reagimin e Musliut.
Musliu thotë se për një kohë të gjatë është përmbajtur të reagojë ndaj gjithçkaje që thuhet për familjen e tij, duke shtuar se ka duruar ofendime të vazhdueshme me emra poshtërues të karakterit etnik.
“Nuk do të më lëkundem që të vazhdoj të drejtoj me sukses Agjencinë e Inteligjencës, për të përmbyllur procesin e reformës dhe përtëritjes së agjencisë sonë dhe gruaja ime nuk do të trembet që të vazhdojë punën e saj fisnike në sektorin e OJQ-ve. Iu ftoj që luftën politike për pikë politike ta bëni në atë fushë me projekte të qarta për shoqërinë, si dhe në Kuvend, e jo me lajme të rrejshme ku nënçmoni drejtorin e Agjencisë së Inteligjencës që është një aktor i rëndësishëm për sigurinë e qytetarëve”, ka shkruar Musliu.
Ai i bën thirrje Kovaçkit që të kërkojë falje publike për pohimet e tij në konferencën e sotme./Telegrafi/
U akuzua nga OBRM-PDUKM për ndikim në qeveri, Musliu: Unë dhe bashkëshortja ime një kohë të gjatë jemi cak i sulmeve, Kovaçki të kërkojë falje appeared first on Telegrafi.