Ministri i Punëve të Brendshme, Pançe Toshkovski zbuloi se një pjesë e zjarreve që prej ditësh janë aktive në mbarë vendin janë të qëllimshme. Sipas tij, një pjesë e vatrave të zjarrit janë pasojë e erërave të forta dhe kushteve të rënda atmosferike, megjithatë, për disa prej tyre thotë se ka dyshime të bazuara se janë shkaktuar me qëllim.
“Sapo të neutralizohet dhe lokalizohet zjarri i dytë, menjëherë fillon një zjarr i tretë. Të gjitha këto janë të lidhura me infrastrukturë kyçe të shtetit dhe nga profesionistët brenda MPB-së ekzistojnë dyshime të forta – jam i informuar se dyshojnë – se bëhet fjalë për një skenar të caktuar që synohet të realizohet në Maqedoni”, deklaroi Pançe Toshkovski, Ministër i Punëve të Brendshme.
Në përballjen me zjarret, prej dje është aktivizuar edhe mekanizmi evropian i ndihmës, i cili do të ndihmojë në shuarjen e tyre.
“Është aktivizuar mekanizmi për ndihmë evropiane në përballje me zjarret dhe të gjitha kapacitetet e shtetit janë vënë në funksion maksimal. Mund të theksoj se nga ana e Greqisë janë vënë në dispozicion të shtetit dy avionë “kanader”, të cilët do të përdoren për shuarjen e zjarreve, si dhe dy ekipe këmbësorie që janë vënë në dispozicion përmes mekanizmit të BE-së”, tha Pançe Toshkovski, Ministër i Punëve të Brendshme.
Toshkovski megjithatë theksoi se pjesa më e madhe e zjarreve janë vënë nën kontroll, duke theksuar se pjesëtarët e njësive zjarrfikëse, Drejtorisë për Mbrojtje dhe Shpëtim, Ministrisë së Punëve të Brendshme, Armatës dhe Qendrës për Menaxhim me Kriza janë vazhdimisht në terren.
Toshkovski: Zjarret janë pjesë e një skenari të caktuar që synohet të realizohet në Maqedoni appeared first on Telegrafi.
