Deputeti dhe ish-ministri i Punëve të Brendshme, Oliver Spasovski, vlerësoi se mënyra se si po zhvillohet hetimi për tragjedinë në diskotekën “Puls” në Koçan ngre dyshime serioze për kapacitetin e Prokurorisë dhe mund të çojë në një zhgënjim të ri te opinioni dhe familjet e viktimave.
Në emisionin “Studio natën” në 4TV, Spasovski theksoi se nuk duhet të kërkohet përgjegjësi te funksionarët e së kaluarës vetëm për të qetësuar revoltën publike, por fajësia duhet të përcaktohet mbi bazën e një lidhjeje të drejtpërdrejtë shkak-pasojë me tragjedinë.
“A mund të mbajnë përgjegjësi kryetarët e komunave që kanë qenë në detyrë në vitin 2012 ose 2017 për atë që ka ndodhur në vitin 2025? Duhet të ketë kauzalitet dhe një rrjedhë të qartë që do të garantojë drejtësi”, deklaroi Spasovski.
Ai paralajmëroi se duke përfshirë të gjitha lëshimet e mundshme dhe ish-funksionarët në të njëjtin rast, ekziston rreziku që i gjithë procesi të rrëzohet në gjykatë.
Spasovski hodhi poshtë edhe tezën se diskoteka kishte funksionuar në “ilegalitet të thellë”, duke theksuar se funksionimi i saj ishte i njohur për të gjithë opinionin publik.
“Të gjithë e dinim se ajo diskotekë funksiononte – edhe qytetarët e Koçanit, edhe njerëzit në gjithë Maqedoninë. Hetimi duhet të tregojë kush dhe si ka marrë vendime për funksionimin e saj”, tha ai.
