Situata me liqenin e Ohrit po bëhet dita-ditës më alarmante. Pjesë të tëra të vijës së bregut janë të thata. Kjo është më e dukshme përgjatë shëtitores së qytetit në Ohër, ku janë formuar ishuj të vegjël.
Niveli është rreth njëzet centimetra nën mesataren për këtë periudhë të vitit dhe është 693.18 metra mbi nivelin e detit, që është vetëm 8 centimetra mbi lartësinë minimale prej 693.10.
Pronarët e varkave thonë se rajoni i Ohrit është lënë në mëshirën e kohës dhe se për shkak të nivelit të ulët të ujit, mezi i parkojnë varkat e tyre.
“Jo keq, por situata është katastrofike. Nuk e di nëse ka ndonjë përgjegjës që kujdeset për nivelin e ujit të liqenit. Mund të shihni se një metër ka rënë dhe askush nuk merr masa për të rregulluar këtë. Nuk e di nëse ka ndonjë organ përkatës që mund të kujdeset për këtë. Nëse keni dikë ta përmendni, të gjithë kolegët tanë që punojmë këtu do të dëshironim t’i themi, ju lutemi merrni masa të menjëhershme sepse kjo nuk është vërtet normale”, tha Zoran Angelloski – pronar i varkës.
Vite me radhë aktivistët alarmojnë se liqeni i Ohrit po përdoret si rezervuar artificial për prodhimin e energjisë elektrike, gjë që ndikon negativisht në florën dhe faunën brenda tij. Situata ka qenë e tillë gjatë gjithë dimrit, edhe pse liqeni duhet të ishte mbushur me ujë tashmë. Në vitin 2023, liqeni ka marrë pjesë me 3,65% të prodhimit të përgjithshëm vendas të energjisë elektrike ndërsa në vitin 2024 ka marrë pjesë me 2,86%.
“Prioriteti i parë është shfrytëzimi i ujërave për ujitje, pije dhe për nevoja ekonomike kurse prioriteti i katërt është prodhimi i energjisë nga ujërat. Kësaj duhet t’i përgjigjemi siç duhet dhe t’i mbrojmë burimet e ujit sepse siç e shihni, veçanërisht për liqenin e Ohrit, në aspektin turistik, nuk duhet të lejojmë asnjë luhatje të burimeve të ujit të liqenit të Ohrit”, u shpreh Vangell Fustiq – profesor.
Banorët kanë frikë se liqeni i Ohrit mund të pësojë fatin e liqenit të Prespës, i cili po zhduket me shpejtësi nga harta e liqeneve natyrore dhe asnjë qeveri nuk ka gjetur një mënyrë për ta ndihmuar deri më tani. Frika është edhe më e madhe nëse dihet se uji nga liqeni i Prespës rrjedh natyrshëm në liqenin e Ohrit.
Nga EMV thonë se janë të kujdesshëm që niveli i liqenit të Ohrit të mos bjerë nën lartësinë minimale prej 693.10, që do të thotë minimumi biologjik. Megjithatë, sipas ekspertëve, arsyet e kësaj situate duhen kërkuar edhe te ndryshimet klimatike, thatësira dhe sasia e ulët e reshjeve gjatë gjithë periudhës së kaluar./Alsat/
Situata me liqenin e Ohrit alarmante appeared first on Telegrafi.
