Presidentja Gordana Siljanovska-Davkova u takua me homologun e saj bullgar, Rumen Radev, në kuadër të Samitit për ndryshimet klimatike (COP29) në Baku.
Siç raportojnë mediat bullgare, në fillim të bisedës, Radev e falënderoi për ftesën në takim dhe deklaroi se ky është një vazhdim i rëndësishëm i “marrëdhënieve tona shumë të hapura dhe miqësore”.
“Ajo që është e rëndësishme është se çfarë duhet t’i themi njëri-tjetrit. Bisedat tona janë shumë miqësore dhe shumë domethënëse. Dhe më vjen shumë mirë që së bashku me ju mund të vendosim tonin për marrëdhëniet midis Bullgarisë dhe Maqedonisë së Veriut”, tha Radev cituar nga “BNT”.
Me këtë u pajtua edhe presidentja e RMV-së, e cila tha se kolegu i saj bullgar është “elementi më i qëndrueshëm në vend”.
“Kemi pasur një fillim të mirë dhe duhet të vazhdojmë kështu. Në Bullgari, mendoj se gjithçka është e ndryshueshme, përveç jush. Jeni elementi më i qëndrueshëm në vend. Këtë e kam dëgjuar nga kolegët tanë”, tha Siljanovska Davkova.
Siljanovska tha se gjëja më e rëndësishme është që njerëzit të komunikojnë me ne.
“Duhet t’i ndjekim qytetarët dhe atje ata janë të lumtur për këngëtarët maqedonas të operës, si dhe në Shkup për këngëtarët e shquar të operës bullgare. Qytetarët bullgarë dhe maqedonas e kuptojnë njëri-tjetrin dhe do ta kuptojnë njëri-tjetrin”, tha Presidentja.
Në fund të bisedës, Siljanovska tha Radevit se ajo “ka ardhur në një mision kulturor” dhe se “dyert janë të hapura që ai të vijë në Shkup”.
Sipas mediave bullgare, Radev ka treguar se do të ishte i lumtur nëse populli i Bullgarisë dhe Maqedonisë së Veriut kanë një mundësi më të madhe për të komunikuar me njëri-tjetrin./Telegrafi/
Siljanovska-Radev: Bisedat tona janë miqësore, vendosëm tonin për marrëdhëniet dypalëshe appeared first on Telegrafi.
