Presidentja Gordana Siljanovska-Davkova sot, përpara fjalimit të saj në Asamblenë e Përgjithshme të OKB-së në New York, mbajti një fjalim në seancën plenare kushtuar 30-vjetorit të Axhendës Botërore të të Rinjve.
Siljanovska-Davkova theksoi se asnjë vend, asnjë rajon nuk mund të përparojë nëse neglizhon të rinjtë e tij.
“Kjo është arsyeja pse Kombet e Bashkuara miratuan Programin Botëror të Veprimit për të Rinjtë. Sot, ndërsa shënojmë këtë përvjetor, ne pranojmë si sukseset ashtu edhe mangësitë. Shumë është bërë, por mbetet shumë për t’u bërë”, tha Siljanovska.
Duke iu drejtuar të rinjve, Presidentja theksoi se në rininë e saj ajo tërhiqej nga tekstet filozofike të Pink Floyd, veçanërisht kënga “Another Brick in the Wall”, në të cilën ata refuzojnë arsimin e bazuar në kontrollin e mendimit dhe u thonë mësuesve t’i lënë fëmijët rehat.
“Kur u bëra profesoreshë universiteti, shpesh kisha në mendje këtë këngë subversive. Kjo është arsyeja pse sot nuk jam këtu për t’ju dhënë leksione, por për t’u frymëzuar nga ju, të rinjtë. Gjatë gjithë historisë, bashkëmoshatarët tuaj nuk kishin frikë të flisnin hapur, të sfidonin autoritetin, të refuzonin dogmatizmin dhe të luftonin për idealet, ndonjëherë me koston e jetës së tyre”, tha Siljanovska-Davkova.
Sipas saj, të rinjtë, si rebelë me një kauzë dhe kërkues të së vërtetës, kanë qenë gjithmonë bartës të ndryshimeve.
“Unë vij nga një vend i vogël kontinental evropian. Ne kemi pritur për njëzet vjet për t’u bërë anëtar i Bashkimit Evropian. Shumë nga bashkëmoshatarët tuaj maqedonas janë lodhur duke pritur për një të ardhme evropiane dhe për këtë arsye po largohen nga vendi. Kjo vlen për shumicën e vendeve në Ballkanin Perëndimor. Për vendet e vogla si i yni, statistikat nuk janë një abstraksion”, tha Siljanovska-Davkova./Telegrafi/
