Drejtori i Klinikës së Fëmijëve, Rexhep Memedi, informoi se në klinikën e tyre është rritur numri i pacientëve me infeksione respiratore dhe të zorrëve.
“Kjo pjesë e vitit dominohet nga virozat e stinës, të cilat janë më të shpeshta. Dhe kjo është pothuajse çdo vit në këtë kohë. Kemi rritje të numrit të pacientëve me simptoma respiratore dhe infeksione të zorrëve të cilët po trajtohen në klinikën tonë dhe po marrin kujdesin e nevojshëm”, tha Memedi gjatë promovimit të sotëm të pajisjeve në Klinikën e Fëmijëve.
Drejtori Memedi theksoi se po punojnë me kapacitet të plotë dhe po bëjnë maksimumin për të kryer triazhin e duhur dhe për të mbajtur në spital pacientët e sëmurë më rëndë.
Instituti i Shëndetit Publik në raportin e tij për periudhën 30 dhjetor 2024 deri më 5 janar të këtij viti bën me dije se numri i rasteve me grip është rritur. Nga gjithsej 331 persona të infektuar, 101 janë fëmijë nga 5 deri në 14 vjeç dhe 42 janë fëmijë të moshës 0 deri në 4 vjeç./Telegrafi/
Rritet numri i fëmijëve me infeksione respiratore në Klinikën e Fëmijëve në Shkup appeared first on Telegrafi.