Sot në Gjykatën Themelore të Tetovës ka nisur procesi i rigjykimit të rastit të djegies së Spitalit Modular, në të cilin humbën jetën 14 persona.
Përfaqësuesi i familjarëve të viktimave, Mumin Ismaili, tha se nuk janë të kënaqur me këtë proces gjyqësor, duke shtuar se duhet persona tjerë të jenë të akuzuar për djegien e spitalit modular.
“Rigjykimi filloi, rigjykimi mbaroi, me pretendimin se avokati i Artan Etemit është i sëmurë dhe rigjykimi u anulua për në nëntor. Ne si familjarë nuk jemi të kënaqur me këtë proces gjyqësor, bëjnë skena të kota, që nuk i kanë hije një kombi apo njeriu, pasi u dogjën 14 persona”.
“Presim në nëntor të shohim nëse do të ketë gjykim ose jo. Ne e kemi cekur në secilën seancë se në këtë akuzë ka zinxhir më të madh të akuzuarve, por shteti hesht në këto raste. Duhet të jenë edhe ish-ministri i Shëndetësisë, Venko Filipçe, i cili tashmë është bërë kryetar partie, por nuk është”, tha mes tjerash Ismaili.
Ndryshe, vitin e kaluar Gjykata Themelore Penale në Tetovë dënoi Florin Besimi dhe Artan Etemi me 1 vjet e 6 muaj burg me kusht dhe 1 milion denarë dënim me para, ndërsa Boban Vuçevski dhe Klinika e Tetovës si institucion u liruan nga akuzat. Në maj të këtij viti, Gjykata e Apelit në Gostivar ktheu në rigjykim rastin./Telegrafi/
Rigjykimi për Spitalin modular në Tetovë, Ismaili: Persona të tjerë duhet të jenë të akuzuar appeared first on Telegrafi.