Maqedonia po e bllokon veten në rrugën drejt Bashkimit Evropian sepse nuk dëshiron të përmbushë kriteret për anëtarësim. Kjo u deklarua në Zagreb nga presidenti bullgar Rumen Radev, i cili ndodhet në një vizitë zyrtare në Kroaci me ftesë të Zoran Milanovic.
Presidenti bullgar theksoi se Bullgaria nuk do të heqë dorë nga mbrojtja e të drejtave të bullgarëve që jetojnë në Maqedoni.
“Ne ende presim që Republika e Maqedonisë së Veriut të përmbushë një kusht të shkruar qartë që do të hapte derën për fillimin e negociatave. Dhe kjo është garantimi i barazisë së bullgarëve në këtë vend përmes përfshirjes së tyre në kushtetutë së bashku me popujt e tjerë që formojnë shtetin”, tha Radev, i cituar nga Radioja Kombëtare Bullgare.
Radev ishte kategorik se Bullgaria nuk po vendos kushte të reja përtej atyre për të cilat është rënë dakord tashmë.
“Por ne këmbëngulim që gjithçka për të cilën është rënë dakord të respektohet”, tha Radev gjatë një konference për shtyp me mikpritësin e tij Zoran Milanoviç.
Radev: Nuk ka kushte të reja përveç atyre për të cilat është rënë dakord tashmë, Maqedonia po bllokon rrugën e vet drejt BE-së appeared first on Telegrafi.
