Dy drejtorët e Klinikës së Onkologjisë për dy vite, nga viti 2019 deri në vitin 2021, kanë blerë barna pa tender dhe pa ditur nevojat reale të pacientëve. Së bashku me tre mjekë onkologë, të cilët kanë shkruar terapi të tepërt, kanë arritur të shkaktojnë dëme të mundshme rreth 30 milionë euro.
Pas bastisjes së djeshme të Onkologjisë në shtëpitë e të dyshuarve, Prokuroria ka kërkuar nga Gjykata Penale që dy drejtorëve t’u konfiskohen pasaportat dhe të mos lejohet afrimi i ish-drejtorit të mjekësisë në vendin e punës, me çka edhe ka hapur lëndë kundër tyre, përcjell Telegrafi Maqedoni.
Nuk është kërkuar asnjë masë për mjekët onkologë dhe ata mund të vazhdojnë të punojnë me pacientët. Nga hetimet paraprake të deritanishme të prokurorisë ka rezultuar se barnat e shkruar tepërt ende nuk dihet ku kanë përfunduar.
Tani për tani bëhet e ditur se nuk kanë përfunduar në tregun e zi në Kosovë. Një deri në dy doza plus jepeshin për pacient. Ekziston edhe një rast i izoluar kur i janë dhënë tetë terapi shtesë të cilat ai nuk i ka marrë. Një ditë para vdekjes, pacientët kanë marrë edhe terapi të shtrenjtë biologjike që sigurisht nuk e kanë marrë, sepse nuk ka pasur nevojë për të.
Prokuroria ka dijeni edhe për një banesë ku mbaheshin ilaçet e keqpërdorura. Prokurorët shqyrtuan 25,500 dosje elektronike dhe në letër dhe folën me 35 deri në 40 pacientë me kancer./Telegrafi/
Prokuroria hap hetim kundër dy drejtorëve dhe tre onkologëve për rastin “Onkologjia” appeared first on Telegrafi.