OBRM-PDUKM ka reaguar ndaj fjalimit të liderit të LSDM-së opozitare, Venko Filipçe, në tribunën e partisë me titull “Maqedonia e poshtëruar – Një vit qeverisje”, duke theksuar se politikat e tij janë vazhdimësi e regjimit të vjetër të Zaevit.
“Çdo nder për interpretimin aktorial të Venko Filipçes – vetëm populli nuk duartroket, por rrotullon sytë. Kur shfaqet ai, të gjithë menjëherë kujtojnë jetët e djegura në spitalet modulare, vaksinat kineze të paguara por të pafurnizuara, si dhe tenderët milionë dollarësh të ndarë në 4 sy me miqtë e tij nga politika. Njeriu që udhëhoqi politikën më të turpshme shëndetësore në histori, sot jep leksione për dinjitet. Vërtet material i shkëlqyer për komedi stand-ap. Për shtatë vjet e zvarritët Maqedoninë nëpër baltë. I varfëruat qytetarët, i trembët investitorët, i partizuat institucionet deri në portierin e fundit dhe e shndërruat vendin në një ring boksi për kartelin tuaj të brendshëm”, thekson OBRM-PDUKM.
Partia në pushtet tha se tani që dikush më në fund ka filluar të pastrojë, paraqitet pikërisht Venko për të thënë se “nuk kishte perspektivë”.
“Perspektiva, z. Filipce, u zhduk kur hipët në klasin biznes dhe filluat t’i çonit miqtë tuaj në udhëtime të shtrenjta, ndërsa pacientët i çonin në salla të pasterilizuara me fotovoltaikë që nuk arritën kurrë. Tani ju pengon që qeveria e re, në vend që të bënte biznes në Dubai, zgjodhi punën në shtëpi. Se në vend të propagandës, zgjodhi projekte. Dhe se në vend të tenderëve për të vetët, vendosi përgjegjësi për të gjithë. Po, jeta është e vështirë – por për herë të parë pas një kohe të gjatë, jo për shkak të vjedhjes, por për shkak të shlyerjes së borxheve tuaja. Maqedonia nuk është poshtëruar, Maqedonia po ngrihet – dhe juve po ju lë pas. Dhe jo – nuk do t’ju presë. Prandaj uluni, bëni një pushim nga gënjeshtrat. Këtë herë – pa tender. Dhe telefononi Zaevin, ndoshta ka ndonjë koncert, është për ju”, thuhet në kumtesën e OBRM-PDUKM-së.
OBRM-PDUKM: Filipçe, njeriu që udhëhoqi politikë të turpshme, sot jep leksione për dinjitet appeared first on Telegrafi.