Ministri i Punëve të Jashtme dhe Tregtisë së Jashtme, Timço Mucunski dje dhe sot mori pjesë në Forumin Ekonomik Delphi të mbajtur në Greqi, ku mbajti një panel diskutimi me temë: “A është aleanca BE-SHBA përtej riparimit?”.
Në fjalën e tij, ministri iu referua perspektivës evropiane të vendeve të Ballkanit Perëndimor, rëndësisë së bashkëpunimit rajonal, stabilitetit të rajonit, partneritetit strategjik brenda NATO-s, si dhe bashkëpunimit me Shtetet e Bashkuara dhe lidhjes transatlantike.
Me këtë, Mucunski theksoi rëndësinë e mbështetjes rajonale, e cila u shfaq veçanërisht pas tragjedisë në Koçan, duke shprehur mirënjohjen e sinqertë ndaj Greqisë për solidaritetin dhe ndihmën e treguar mjekësore.
Ministri theksoi se zgjerimi i Bashkimit Evropian nuk është vetëm një domosdoshmëri ekonomike dhe tregtare, por edhe një parakusht për stabilitet politik dhe të sigurisë në të gjithë kontinentin.
Ai tha se është e nevojshme të sigurohet një rrugë e qartë dhe e prekshme përpara për rajonin, e cila do të rivendosë besueshmërinë dhe do të përmbushë pritjet nga procesi i integrimit evropian.
Lidhur me rolin e Shteteve të Bashkuara, Mucunski nënvizoi rolin e tyre kyç si investitor, jo vetëm në atë politik dhe të sigurisë, por edhe në stabilitetin ekonomik të rajonit, duke vënë në dukje se Shtetet e Bashkuara janë ndër mbështetësit më të dukshëm dhe më të fortë të procesit të zgjerimit të Bashkimit Evropian./Telegrafi/
Mucunski: SHBA-të janë faktor kyç edhe për stabilitetin ekonomik të rajonit appeared first on Telegrafi.
