Ministri i Punëve të Jashtme i RMV-së, Timço Mucunski, sot realizoi takim me ambasadoren e Greqisë, Sofia Filippidou.
Siç njoftojnë nga kabineti i tij, në takim Mucunski shprehu besimin se vendi është fuqishëm i përkushtuar për avancimin e mëtejshëm të bashkëpunimit bilateral, rajonal dhe multilateral me Greqinë, në radhë të parë si partnerë dhe aleatë të NATO-s.
“Në të njëjtën kohë, ministri Mucunski theksoi se interesi ynë është ndërtimi i marrëdhënieve të mira fqinjësore në funksion të sigurisë, stabilitetit dhe prosperitetit të rajonit. Vendi mbetet i vendosur për avancimin e mëtejshëm të marrëdhënieve dypalëshe, përmes dialogut të hapur për të gjitha çështjet me interes të ndërsjellë, me qëllim pasurimin e tyre me përmbajtje të reja dhe në favor të prosperitetit dhe mirëqenies së qytetarëve të të dy vendeve”.
“Bashkëbiseduesit rikonfirmuan edhe interesimin e tyre për intensifikimin e bashkëpunimit ekonomik, aq më tepër që Greqia është në mesin e pesë vendeve me të cilat Republika e Maqedonisë së Veriut ka arritur vëllimin më të madh të tregtisë në vitin e kaluar”, thuhet në njoftim.
Mucunski në takim me ambasadoren greke: Interesi ynë është ndërtimi i marrëdhënieve të mira fqinjësore appeared first on Telegrafi.