Zëdhënsja e Qeverisë së Maqedonisë së Veriut, Marija Miteva në konferencën e sotme për shtyp foli për propozim-buxhetin në pjesën e digjitalizimit.
Ajo tha se nëse krahasohet totali i projekteve të Ministrisë për projekte informative dhe të komunikimit me atë të së kaluarës, mund të konstatohet se ai është 200% më i lartë – gjegjësisht nga 154 milionë denarë në vitin 2023, 182 milionë denarë në vitin 2024, në 365 milionë denarë në vitin 2025.
“Në pjesën e projekteve individuale për vitin 2025 është paraparë ndërtimi i – Qendrës bashkëkohore primare të të dhënave (DATA CENTER) në Shkup, që paraqet investim kapital që paralajmërohet me vite. Në këtë moment, të gjitha sistemet shtetërore janë fizikisht në institucionet e tyre kompetente, një pjesë e madhe e tyre në kushte joadekuate që shkaktojnë një jetë më të shkurtër të pajisjeve, versione të softuerit të pa përditësuar dhe me shkallë të lartë rreziku nga sulmet kibernetike.
Projekti parashikon ndërtimin e një qendre primare të dhënash qeveritare, ku të gjitha organet e administratës shtetërore do të bashkëvendosin pajisjet e tyre. Me këtë, nga njëra anë, shteti do të arrijë kursime të konsiderueshme për shërbimet e kolokimit. Kjo nënkupton përfshirjen e sistemeve të ftohjes, sigurisë, sistemeve të mbrojtjes nga zjarri, mbikëqyrjes dhe mirëmbajtjes së hapësirave,ndërsa nga ana tjetër do të mundësojë një transformim digjital të përshpejtuar. Ky është një projekt shumëvjeçar, por në fillim të vitit 2025 është planifikuar një studim fizibiliteti i cili do të përcaktojë standardet teknike për ndërtimin e qendrës, vendndodhjen dhe mënyrën e sigurimit të qëndrueshmërisë.
Vlera totale e parashikuar e projektit është deri në 40 milionë euro, ndërsa për vitin e ardhshëm me buxhetin janë siguruar 2 milionë euro për studimin e fizibilitetit dhe fillimin e ndërtimit”, tha Miteva.
Ajo shtoi se transformimi digjital nënkupton ndërlidhje më të fortë dhe një të ardhme më të mirë për të gjithë ne, prandaj në vetëm pak muaj pas marrjes së pushtetit ne parashikuam 80 shërbime të reja elektronike, rritje të ndërlidhjes së institucioneve dhe fokus në sigurinë kibernetike. Nëpërmjet këtyre projekteve dhe investimit në digjitalizim, ne sigurojmë pozicionin tonë në botën digjitale./Telegrafi/
Miteva: Qëllimi i Qeverisë është ta transformojë shoqërinë e vendit në shoqëri digjitale, buxheti i MTD-së për vitin 2025 është rritur për 200% appeared first on Telegrafi.
