“Nuk ka interesim nga Bullgaria për ndërtimin e hekurudhës së Korridorit 8”, kështu tha Ministri i Transportit, Aleksandar Nikollovski.
Ai tha se e ka denoncuar Bullgarinë tek bankat dhe institucionet evropiane, pasi Qeveria në Sofje ka vendosur që t`i ridestinojë mjetet për lidhjen hekurudhore me Maqedoninë e Veriut.
Nikollovski letrën ua ka drejtuar delegacionit evropian, por edhe Bankës Evropiane për Investime dhe Bankës Evropiane për Ripërtrirje dhe Zhvillim, me të cilët është nënshkruar marrëveshja për kredi mbi 300 milion euro për t`u lidhur me fqiun lindor.
Por, Sofja e ka demantuar Nikollovksin.
“Ndërtimi i hekurudhës drejt Maqedonisë së Veriut nuk është anuluar”, thonë nga Ministria Bullgare për Transport.
Sipas tyre, Korridori 8 është prioritet kombëtar për Bullgarinë.
“Spekulime mediatike janë pohimet se Bullgaria anulon seksionin bullgar të Korridorit 8. Linja hekurudhore Radomir – Gjueshevë është në funksion dhe pas përfundimit të pjesës nga Gjuesheve deri në Deve Bair me gjatësi 2.5 km, përmes tunelit ndërkufitar mund të kyçet në rrjetin e operatorit të RMV-së.”
Në komunikatë thuhet se Ministria e Transportit me vite të tëra bënë përpjekje për zhvillimin e Korridorit 8 që lidh Detin Adriatik me Detin e Zi, përmes Shqipërisë, Maqedonisë së Veriut dhe Bullgarisë.
Sipas tyre, nga 1.220 kilometra të hekurudhës, më shumë se gjysma apo 747 km janë në Bullgari, kurse kanë mbetur të ndërtohen vetëm 2.5 kilometra. Duke bërë krahasimin, nga Ministria Bullgare e Transportit, thonë se pjesa që mungon në territorin e RMV-së është afërsisht 70 km.
Ministria bullgare e Transportit: Hekurudha e korridorit 8 drejt RMV-së do të ndërtohet appeared first on Telegrafi.