Kryeministri i RMV-së Hristijan Mickoski, ka folur për takimin me Arben Taravarin i cili do të mbahet sot në ora 17:00. Mickoski tha se ka mendim pozitiv për Taravarin, dhe se ai duhet të vendos se në cilën anë do të jetë.
“Po, takimi do të jetë sot në orën 17:00 në Qeveri. Do të jetë takim ku do të diskutojmë me Taravarin për zhvillimet aktuale politike. Sa i përket aktiviteteve të tij aktuale si pjesë e Qeverisë, ne komunikojmë pothuajse çdo ditë. Sigurisht, kjo është një pjesë e pashmangshme. Por, në përgjithësi, do të doja të dëgjoja se si mendon ai për zhvillimet e fundit që janë të njohura për publikun. Sipas mendimit tim, ka dy mundësi për të zgjedhur. Njëra është ajo që ofron kjo Qeveri për reforma, ndryshime, ofrim për qytetarët. Dhe mesazhi i dytë është opsioni që për vite me radhë, do të thoja më shumë se 2 dekada, ka kriminalizuar shtetin, ka shkatërruar institucionet dhe praktikisht ka gjunjëzuar shtetin dhe qytetarët. Dhe kjo është zgjedhja. Nuk ka mundësi të tretë dhe do të doja të dëgjoja nga Taravari se çfarë mundësie ka, sepse nuk shoh një mundësi të tretë”, tha Mickoski.
Mickoski theksoi se si person ka mendim pozitiv për Taravarin.
“Sa i përket marrëdhënieve të mia personale me Taravarin, ne kemi komunikuar në politikë për një kohë të gjatë. Si person, kam mendim pozitiv për Taravarin, por në politikë, karakteri është diçka që ose e ke ose nuk e ke, nuk ka variante fluide këtu, ose e mban fjalën ose nuk e mban. Mendoj se konkretisht në rastin e tij, kam treguar të paktën tre herë se e mbaj fjalën time, dhe kur ka pasur momente kur ndoshta ka pasur dilemë brenda udhëheqjes së partisë”, tha Mickoski.
Ndryshe, sot Taravari tha se vendimi i vetëm i partisë së tij është që në zgjedhjet lokale të dalin me lista të veçanta për këshilltarë komunalë, ndërsa më vonë do të sjell vendim nëse do të jetë ose jo pjesë e Qeverisë./Telegrafi/
Mickoski: Për Taravarin kam mendim pozitiv, me ose pa të Qeveria është stabile appeared first on Telegrafi.
