Kryeministri Hristijan Mickoski, në fjalimin e tij në ceremoninë qendrore me rastin e 34-vjetorit të pavarësisë së Maqedonisë së Veriut, theksoi se 8 Shtatori nuk është thjesht një datë, por vazhdim i ëndrrës dhe i betejave të një populli të vogël që gjithmonë ka luftuar për lirinë e tij.
“Pavarësia nuk është vetëm nënshkrim në letër. Ajo është sakrificë, është luftë, është dashuri për këtë tokë të shenjtë. Është amanet nga paraardhësit dhe zotim për gjeneratat e ardhshme. Duhet të bashkohemi”, u shpreh Mickoski.
Ai theksoi se secili kryeministër, përfshirë edhe vetë atë, ka detyrimin të përkulet para atyre që ëndërruan dhe luftuan për shtetin. Duke përmendur sfidat e 34 viteve të fundit, Mickoski tha se Maqedonia përballet ende me zhgënjim nga sistemi, tranzicion të vështirë, korrupsion dhe mungesë të drejtësisë.
“Në këtë vend ka mbizotëruar ndjenja e padrejtësisë, ku shumë prej atyre që drejtonin ishin pjesë e krimit, ndërsa të pasurit që fitonin në mënyrë të pandershme nuk përfundonin në burg. Kjo duhet të marrë fund. Drejtësia nuk duhet të njohë parti, as pasuri, por vetëm ligjin”, deklaroi ai, duke shtuar se kushdo që ka shkelur ligjin do të përballet me përgjegjësi.
Mickoski theksoi se e ka marrë përgjegjësinë për të udhëhequr shtetin jo për pasuri apo emër, por për të lënë gjurmë dhe për të ndërtuar një të ardhme më të mirë për gjeneratat e ardhshme.
“Unë nuk kam ardhur në këtë post për pasuri apo lavdi personale. Kam ardhur për të kontribuar dhe për të krijuar një të ardhme më të mirë për fëmijët tanë. Duhet të flasim hapur për sfidat dhe të japim të gjithë nga vetja. Atdheu ynë ka të ardhme, por kjo varet nga përkushtimi i secilit prej nesh”, theksoi Mickoski.
Mickoski: Pavarësia nuk është vetëm nënshkrim në letër, por sakrificë, luftë dhe dashuri për atdheun appeared first on Telegrafi.
