Kryeministri Hristijan Mickoski pret ulje dramatike të çmimeve të produkteve në supermarkete me kufizimin e marzhit të shitjes me pakicë dhe shumicë për 10 për qind, masë që do të miratohet nesër në seancën e Qeverisë, ndërsa do të jetë e vlefshme deri më 30 prill.
Në kuadër të vizitës në komunën e Kavadarit, duke iu përgjigjur pyetjes së gazetarëve ai sqaroi se në seancën e djeshme të qeverisë kanë marrë një brifing të detajuar nga Ministri i Ekonomisë dhe Punës, por njëkohësisht do të thoja edhe debrifing nga ana e raportit të dorëzuar nga Inspektorati Shtetëror i Tregut
“Sot jemi takuar në Kuvend, tashmë e kam propozimin në version pune, do të harmonizohet gjatë ditës dhe pres që nesër të miratohet në seancë dhe të zbatohet nga supermarketet apo hipermarketet. Marzhi i shitjes me pakicë dhe shumicë është i kufizuar në 10 për qind. Pres që të ketë një ulje dramatike të çmimeve të atyre produkteve që realisht përdorin qytetarët. Ato janë zgjeruar duke përfshirë produkte higjienike, ushqim për foshnja dhe është përfshirë pothuajse gjithçka që përdorin qytetarët”, deklaroi Mickoski.
Ai vuri në dukje kritikat e opozitës për masën që kërkon që supermarketet dhe hipermarketet të përditësojnë çmimet e produkteve në ueb faqet e tyre.
“Kemi ardhur në konkluzionin, edhe pse shoh se disa zëdhënës të opozitës e marrin me përqeshje, si dhe vetë partitë opozitare, që të gjitha supermarketet dhe hipermarketet të përditësojnë çmimet në mënyrë transparente në ueb faqet e tyre çdo ditë. Nëse hyni tani, nuk do të mund të lexoni çmimet e produkteve. Kjo është një praktikë në disa vende të botës. Nëse në një zinxhir supermarketesh një produkt kushton x denarë dhe në një tjetër kushton x denarë e gjysmë, si konsumator do të mendoj dy herë se ku ta blej atë produkt dhe kjo do të krijojë një lloj konkurrencë mes të tregtarëve”, shtoi kryeministri.
Në seancën e djeshme të qeverisë, ai theksoi se është arritur konkluzion që ministri i Ekonomisë dhe Punës të thërrasë një takim pune dhe të koordinohet me të gjitha institucionet si Komisioni i Mbrojtjes së Konkurrencës dhe Inspektorati Shtetëror i Tregut dhe të dalë sërish në terren për të zgjeruar aksionin edhe në hipermarketet tregtare në pjesën e teknikës së bardhë.
Mickoski: Me kufizimin e marzheve, pres ulje dramatike të çmimeve të produkteve nëpër supermarkete appeared first on Telegrafi.
