Zv. kryeministri i Parë dhe Ministri i Mjedisit dhe Planifikimit Hapësinor, Izet Mexhiti, sot mori pjesë në konferencën me temë “Avancimi i Infrastrukturës së Gjelbër në Ballkanin Perëndimor”, në të cilën theksoi rëndësinë e ndërtimit të infrastrukturës së qëndrueshme, si domosdoshmëri dhe jo si zgjedhje.
Në konferencë, ku mori pjesë edhe Ministrja e Energjisë, Minierave dhe Burimeve Minerale, Sanja Bozhinovska, Mexhiti tha se infrastruktura e gjelbër është një sfidë globale që kërkon veprim kolektiv, vizion dhe bashkëpunim.
“Mënyra se si i formësojmë projektet tona të infrastrukturës ndikon drejtpërdrejt në cilësinë e jetës, stabilitetin ekonomik, mbrojtjen e mjedisit dhe qëndrueshmërinë e komuniteteve tona ndaj ndryshimeve klimatike. Investimet strategjike në infrastrukturë që marrin në konsideratë rreziqet klimatike dhe aspektet e biodiversitetit janë një mjet i fuqishëm për përshpejtimin e zhvillimit ekonomik, krijimin e vendeve të reja të gjelbra të punës, nxitjen e inovacionit dhe përmbushjen e Objektivave të Zhvillimit të Qëndrueshëm deri në vitin 2030, tha Mexhiti.
Mexhiti theksoi rëndësinë e integrimit të aspekteve klimatike dhe mjedisore në procesin e planifikimit dhe vlerësimit të ndikimit në mjedis, duke shtuar se kjo mundëson vendimmarrje të informuar dhe të qëndrueshme afatgjatë.
“Infrastruktura që është rezistente ndaj goditjeve klimatike jo vetëm që mbron buxhetin dhe burimet publike, por gjithashtu kontribuon në stabilitetin dhe sigurinë për brezat e ardhshëm, dhe hapat që duhen ndërmarrë janë ndërtimi dhe përshtatja e sistemeve të menaxhimit të riskut që do të na përgatitin për sfidat klimatike, transformimi i sektorit të energjisë drejt burimeve të rinovueshme, modernizimi i bujqësisë përmes sistemeve efikase të ujitjes dhe praktikave inteligjente klimatike, si dhe përmirësimi i efikasitetit të energjisë dhe qëndrueshmërisë sizmike të ndërtesave”, tha Mexhiti.
Mexhiti: Investimet strategjike në infrastrukturën e gjelbër përshpejtojnë zhvillimin ekonomik appeared first on Telegrafi.