Mbi 250 milionë euro në vit sjellin mërgimtarët në Maqedoninë e Veriut. Dhjetë vitet e fundit, sipas Bankës Qendrore kjo prurje devizore është dyfish më e madhe krahasuar me investimet kapitale që ka vendi ynë. Profesori universitar Ali Maksuti, thotë se pjesa më e madhe e remitancave përfundojnë në sektorin e ndërtimtarisë dhe në dasma, por edhe si injeksion financiar për familjet, e me theks të veçantë, për grupmoshëm më të mëdha.
“Lëvizja e mërgimtarëve në Maqedoni përfshihet në dy periudha e dimrit dhe e verës, dhe, edhe pse janë të shkurta këto ardhje impakti është tejet i madh. Sipas raportit të Bankës Qendrore të Maqedonisë së Veriut për dhjetë vitet e fundit janë 2.5 miliard dollar, që në vit i bie 250 milion euro në vit. Por këto raporte janë zyrtare që dalin nga transaksionet bankare dhe pagesave të shpejta. Por e rëndësishme shumë është sidomos gjatë verës, të hyrat janë 25 për qind më shumë nga transaksionet që bëhet përmes bankave dhe agjencive ndërmjetësuese. Ky impakt është edhe ekonomik edhe financiar për vendin sepse përveç që është një stabilizues ekonomik i vendit, rregullon edhe pagesat e Maqedonisë së Veriut. Kohë pas kohe, të hyrat e emigrantëve kanë qenë më të larta se eksporti i prodhimeve të vendit”, tha Ali Maksuti profesor i ekonomisë në UT.
Por, çfarë bën shteti për mërgimtarët që gjallërojnë ekonominë? Sipas Maksutit, vazhdon të mos ketë stabilitet politik dhe ekonomik, por edhe korrupsion të lartë, që është indikator i madh negativ që pamundëson që një pjesë e dërgesave të mërgimtarëve të investohen.
“Përshtatja juridike për investimet e mërgimtarëve është bërë ligjet ekzistojnë, por nuk ka vullnet politik dhe as që shihet. Këtë e themi nga historia apo përsëritjet që kanë ndodhur vitet e shkuara kur kanë proklamuar se do ketë projekte konkrete investime, madje u bë edhe një ministri për diasporën para ca vitesh, por realisht këto ishin vetëm vizita nëpër kafene në Amerikë, Australi e Evropë. Çdo investitor i huaj apo i vendit sheh dy pika të rëndësishme, korrupsionin dhe stabilitetin politiko ekonomik. Pastaj me korrupsion Maqedonia e veriut rënditet lartë me korrupsionin që është një treguar i pasigurisë për investime”, tha Ali Maksuti profesor i ekonomisë në UT.
Sipas Maksutit, këtë vit remitancat e mërgimtarëve kanë tejkaluar edhe shifrën e viteve të shkuara, që është pasojë e pandemisë për disa vite me radhë, pastaj edhe krizës ekonomike. Pritjet për këtë vit janë që remitencat të arrijnë në 300 milionë euro që futen në rrugë zyrtare, pa i llogaritur paratë që futen pa u lajmëruar në organet e shtetit./Alsat.mk
Mërgimtarët gjallërojnë ekonominë e Maqedonisë, për një vit sjellin mbi 250 milionë euro appeared first on Telegrafi.
