Shefi i bashkëpunimit në delegacionin e Bashkimit Evropian, Stefan Hudolin, në konferencën përfundimtare të projektit “Rritja e cilësisë së arsimit dhe kujdesit parashkollor” theksoi se duhen përpjekje shtesë për zhvillimin e arsimit parashkollor dhe vendi duhet të bëjë përpjekje shtesë në dy fusha, përkatësisht qasjen dhe cilësinë.
“Së pari për sa i përket qasjes, pavarësisht progresit të fundit, regjistrimi i fëmijëve nga 3 deri në 6 vjeç, në moshën e hershme shkollore është 46 për qind, që është ende shumë i ulët, veçanërisht pasi shifra 96 për qind, që është synimi në BE. Kjo është gjysma. Ne e dimë se në Maqedoninë e Veriut, familjet më të pasura kanë më shumë gjasa të shkojnë në arsimin parashkollor. Gjithashtu, vetëm katër për qind e fëmijëve romë janë në arsimin parashkollor dhe kjo duhet të jetë e disponueshme për të gjithë, pavarësisht nga të ardhurat e prindërve”, tha Hudolin.
Ai shtoi se kopshtet duhet të kenë një vend për të gjithë fëmijët, pavarësisht se ku jetojnë në një mjedis urban apo rural.
“Kjo do të thotë që ndërtesat e reja nuk duhet të ndërtohen me çdo kusht, por ndërtesat ekzistuese duhet të rishikohen për të optimizuar rrjetin e shkollave dhe kopshteve. Duhet të jetë prioritet që të kemi numra racionalë, sepse nëse ka shumë fëmijë në klasa, atëherë mësimi bëhet i vështirë dhe nëse grupet janë më të vogla, atëherë mësuesit mund të fokusohen individualisht tek të gjithë fëmijët”, theksoi ai.
Ndërkaq, ministri i Politikës Sociale, Demografisë dhe Rinisë, Fatmir Limani, tha se projekti ka ndikuar në punën e çerdheve, duke shpresuar se trajnimet, manualet dhe ndryshimet ligjore të propozuara, të cilat janë ofruar në kuadër të projektit, do të paraqesin një bazë të mirë për zbatimin praktik, i cili do të sigurojë përmirësimin e cilësisë së shërbimeve në kopshte.
“Në periudhën e kaluar në kopshte janë organizuar forma dhe zhvillime të ndryshme profesionale të punonjësve. Modernizimi i zhvillimit profesional dhe vendosja sistematike e tij kishte për qëllim ofrimin e një qasjeje të unifikuar, e cila do të sjellë efekte pozitive në punën e të gjitha profileve profesionale, por edhe të qendrës së kujdesit për fëmijë si institucion”, tha Limani.
Ndër të tjera, ai shtoi se është e nevojshme të përmirësohet procedura për licencimin e kuadrit mësimor në kopshte.
Maqedoni, 46% e fëmijëve shkojnë në çerdhe appeared first on Telegrafi.
