Eurodeputeti bullgar Andrei Kovaçev nga grupi i Partive Popullore Evropiane mbrëmë deklaroi edhe një herë se Maqedonia e Veriut është dukshëm prapa në procesin e integrimit evropian krahasuar me Shqipërinë dhe Malin e Zi.
Në një intervistë për mediat bullgare, Kovaçev theksoi se ekziston një konsensus i gjerë në Parlamentin Evropian se vendet kandidate duhet të respektojnë detyrimet që kanë ndërmarrë. Sipas tij, për Maqedoninë e Veriut kjo do të thotë përfshirjen e komunitetit bullgar në Kushtetutë.
Ai kritikoi qasjen e qeverisë së Hristijan Mickoskit, duke thënë se përpjekjet për të ndryshuar Kornizën Negociuese nuk kanë gjasa të kenë sukses.
“Në vend që të zbatojnë reformat dhe të përshpejtojnë integrimin evropian, ata po mbeten katastrofikisht prapa Shqipërisë dhe Malit të Zi”, tha Kovaçev për “Taralej.bg.”
Eurodeputeti komentoi gjithashtu edhe për rrugën evropiane të Serbisë. Kur u pyet nëse Beogradi mund të përfundonte me një pezullim të fondeve evropiane, Kovaçev u përgjigj se një gjë e tillë është e mundur.
“Kategorikisht. Aleksandar Vuçiq na ka bërë të harrojmë për vite me radhë se ai po bën reforma dhe po kërkon integrimin evropian. Në praktikë, ato duken ndryshe. Ka pakënaqësi në shoqërinë serbe. Në rajonet perëndimore – Caribrod, Bosilegrad, ka probleme serioze me të drejtat e bashkatdhetarëve tanë”, tha eurodeputeti./Telegrafi/
