Kopshti i Strugës nuk do të pranojë fëmijë nga 1 shkurti nëse komuna nuk e zgjidh problemin me 21 përkëdhelëse dhe edukatore. Ata disa vite punojnë me kontratë dhe marrin pagë prej vetëm 10.000 denarë. Shprehen se nga 1 shkurti u është thënë se paga e tyre do të jetë edhe më e ulët, përkatësisht 5000 denarë. Ata sot dolën në protestë paralajmëruese dhe kanë mbështetjen e kolegëve të tyre statusi i të cilëve është zgjidhur tashmë.
“Kemi vendosur që nga 1 shkurti të mos vijmë në punë. Kjo do të thotë se shumica e grupeve do të mbyllen. Fëmijët nuk do të pranohen. Dy pjesët me çerdhe do të mbyllen sepse jemi pesë femra me kontratë. Ka edhe në grupe të tjera, ku një edukatore lihet të punojë pa përkëdhelëse”, tha Emilija Marinoska Pejçinoska- punonjëse me kontratë pune.
“Të gjithë jemi të licencuar, të gjithë kemi licenca për këtë punë. Duam të na gjejnë zgjidhje, të paktën të marrim pagën minimale dhe sigurim. Asnjëri prej nesh nuk është i tepërt. Të gjithë kemi grupe me vite të tëra. E bëjmë të njëjtën punë si ata me vendime”, deklaroi Vesna Markoski – punonjëse me kontratë në vepër.
Duke punuar me kontratë në vepër, prej vitesh nuk kanë as sigurim shëndetësor e as pensional. Madje, ata kanë edhe muaj të papaguar gjatë vitit.
“Jemi të detyruar të paguajmë dhe të regjistrohemi në Entin e Punësimit. Kemi katër muaj që jemi në pushim pa pagesë. Janar, korrik, gusht dhe shtator jemi në shtëpi në pushim pa pagesë dhe kjo e bën punën edhe më të komplikuar”, u shpreh Emilia Marinoska Pejçinoska – e punësuar me kontratë në vepër.
Ndërkohë, siç pretendojnë punonjësit, në pamundësi për të zgjidhur problemin, drejtoresha e çerdhes ka dhënë dorëheqje. Alsat ka kërkuar qëndrim nga komuna e Strugës nëse dhe kur do ta zgjidhë statusin e këtyre personave. Por prej atje nuk kemi marrë përgjigje. Çerdhja ka aktualisht mbi 500 fëmijë në të gjitha grupet në dy godinat dhe po aq të tjerë janë në listën e pritjes. /Alsat.mk
Kopshti i Strugës nuk do të pranojë fëmijë nga 1 shkurti, kujdestarët do të jenë në protest appeared first on Telegrafi.