Është vendosur arsimi fillor formal në kushtet spitalore për fëmijët në mjekim afatgjatë në Klinikën për Sëmundje të Fëmijëve në Shkup. Këtë sot zyrtarisht e njoftuan ministrja e Arsimit dhe Shkencës, Vesna Janevska, ministri i Shëndetësisë Azir Aliu dhe Marija Vuk, kryetare e OJQ SANO – Shoqatë e cila ndihmon fëmijët me kancer.
Siç është sqaruar, MASH me mbështetjen e sektorit të shoqërisë civile (OJQ SANO – shoqatë e cila ndihmon fëmijët nga kanceri), vendos arsimin fillor formal për fëmijët në mjekim afatgjatë në Klinikën për Sëmundje të Fëmijëve.
“Janë bërë ndryshime në rregulloren ligjore dhe nënligjore dhe shkollat ku janë të regjistruar fëmijët të cilët po mjekohen në Klinikë duhet t’i përfshijnë ata në mësime nga shtatori – drejtpërdrejt, gjegjësisht online gjatë orëve të mësimit, ose përmes komunikimit asinkron (mësimdhënësi i shpërndan materialet nxënësit, cakton detyrat, vlerëson njohuritë…). Mësimdhënësi mund të organizojë edhe mësime individuale për nxënësin, përmes disa mjeteve digjitale, u nda sot në Klinikë dhe u theksua se e gjithë kjo varet edhe nga gjendja shëndetësore e fëmijës”, njoftojnë nga Ministria e Arsimit.
Qëllimi është që fëmijët të mos kenë ndërprerje në procesin edukativo – arsimor dhe pas përfundimit të mjekimit, më lehtë të risocializohen, të kthehen në shkollë dhe në mesin e shokëve të tyre. U theksua se asnjë fëmijë nuk duhet të privohet nga arsimi vetëm sepse po mjekohet dhe se sëmundja nuk do të thotë izolim, ndërprerje apo harresë. Në vazhdim është trajnim për punë efektive të mësimdhënësve nga distanca me këta fëmijë.
“Kam nderin e madh si drejtor i Klinikës për Sëmundjet e Fëmijëve të jem pjesë e këtij momenti shumë të rëndësishëm për fëmijët në spital. Bëhet fjalë për projektin – Futja e arsimit formal për fëmijët që janë në qëndrim të gjatë në spital ose po trajtohen në shtëpi për shkak të gjendjeve të rënda shëndetësore, siç janë sëmundjet malinje dhe të tjera. Ky projekt mbështetet nga Ministria e Arsimit, Ministria e Shëndetësisë, Klinika për Sëmundjet e Fëmijëve dhe OJQ-ja SANO”, tha drejtori i Klinikës, Rexhep Memedi.
Ai nënvizoi se arsimi nuk është vetëm mjet për mësim, por edhe mjet kyç për qëndrueshmëri emocionale dhe ruajte të vetëbesimit të fëmijëve, prandaj sipas kësaj, shtoi, përfshirja e fëmijëve nga spitali në arsimin formal nënkupton gjysmën e shëndetit, sepse shëndeti i mirë mendor te këta pacientë të vegjël nënkupton se shumë më lehtë dhe më të motivuar do ta kalojnë rrugën e gjatë të mjekimit.
“Shpreh mirënjohjen time të madhe për Ministrinë e Arsimit, Ministrinë e Shëndetësisë dhe Shoqatën SANO për këtë hap historik në aspektin e edukimit të nxënësve në spital. Në emër të të gjithë ekipit, u uroj nxënësve në spital mësim të suksesshme, ndërsa ne do të bëjmë çmos që t’i ndihmojmë ata së pari të kapërcejnë sëmundjen, dhe pastaj numrat dhe shkronjat”, theksoi Memedi.
Ministri i Shëndetësisë, Azir Aliu tha se në qendër të shëndetësisë është pacienti.
“Ne si Ministri e Shëndetësisë jemi kompetentë të krijojmë infrastrukturë e cila do të jetë në pajtim me nevojat për mësim në distancë. Nga ana tjetër, Ministria e Arsimit krijon metodologji dhe materiale të cilat fëmijët do të duhet t’i kalojnë, me qëllim që t’i marrin shërbimet shëndetësore por edhe arsimore”, theksoi Aliu.
Ai paralajmëroi se prej nesër do të krijohet grup pune, me qëllim të sigurimit të kuadrit adekuat cilësor për punë.
Ministrja Janevska tha se deri më tani për këta fëmijë ishte bërë lëshim dhe diskriminim serioz. Sot, shtoi ajo, me projekt të mirë dhe zgjidhje sistemore, tregohet se nuk bëhet fjalë për problem të pazgjidhur.
“Ky proces do të përmirësohet vazhdimisht. Ajo që është domethënëse është se në këtë moment, një numër i caktuar mësuesish që kanë fëmijë të tillë këtu tashmë po i nënshtrohen trajnimit, në mënyrë që të fillojnë punën për të që nga 1 shtatori”, informoi ministrja dhe falënderoi të gjithë ata që morën pjesë në projekt.
Fëmijët me pushim të gjatë mjekësor nuk do ta humbin mësimin, vendoset mësimi formal në Klinikën e Fëmijëve appeared first on Telegrafi.