Qeveria është fuqimisht e përkushtuar në zbatimin e reformave që janë pjesë e Agjendës së Reformës dhe që paraqesin një udhërrëfyes real për një afrim më të shpejtë drejt BE-së dhe për ngritjen e standardit të qytetarëve, tha sot në Bruksel ministrja e Financave Gordana Dimitrieska-Koçoska gjatë takimeve me përfaqësues nga Drejtoria e përgjithshme për politikat e fqinjësisë dhe zgjerimin e Komisionit Evropian (DG NEAR).
“Ajo që është kyçe dhe të cilës Qeveria i kushton rëndësi është zbatimi i reformave për të arritur rritje të përshpejtuar ekonomike. Përveç agjendës reformuese, e cila është përcaktuar së bashku me KE-në, kemi shumë aktivitete të parapara në Programin e punës 2024-2028, të cilat do të sjellin ndryshime për një të nesërme më të mirë”, tha Dimitrieska-Koçoska.
Ajo theksoi se një nga dokumentet më të rëndësishme që pasqyron politikat që do të krijohen – Buxheti për vitin 2025, është përgatitur dhe dorëzuar në procedurë parlamentare.
“Ajo për të cilën do të jemi të përkushtuar ndër të tjera është realizimi i investimeve sepse ato sjellin rritje ekonomike, por sigurisht që prioritet është edhe lufta kundër krimit dhe korrupsionit”, theksoi ministrja e Financave.
Dimitrieska-Koçoska theksoi se ka shumë punë përpara në realizimin e reformave dhe u falënderua për mbështetjen që vendi e merr nga BE-ja. Në bisedat e takimeve u theksua se përparimi në zbatimin e reformave, si dhe forcimi i kapaciteteve të administratës, do të hapin mundësi për qasje më të madhe në mjetet nga fondet e BE-së dhe për investime në rritje.
Dimitrieska-Koçoska, dje në Bruksel, mori pjesë në konferencën “Vota, zgjedhje dhe lidership: Një pikë kthese për Evropën” organizuar nga tink-tenku “Miqtë e Evropës”, ku ishte një nga folësit në panelin e titulluar “Zgjerimi i Evropës: Me çfarë çmimi dhe me çfarë strukture?”, ndërsa para kësaj ka pasur takim edhe me përfaqësues të Partisë Popullore Evropiane (EPP).
Dimitrieska-Koçoska: Jemi të përkushtuar në reformat dhe investimet që do të na afrojnë me BE-në appeared first on Telegrafi.
