Deputeti i LSDM-së Fatmir Bytyqi, sot tha se do të dorëzojnë propozim-ligj për uljen e TVSH-së për energjinë elektrike nga 18% në 5%, si dhe heqje të TVSH-së për produktet ushqimore bazë.
Ai tha se jeta në Maqedoninë e Veriut po bëhet gjithnjë e më e shtrenjtë dhe qytetarët po e kanë gjithnjë e më të vështirë të plotësojnë nevojat elementare të jetesës.
“Indeksi i çmimeve të konsumit në janar 2025, krahasuar me muajin e njëjtë të vitit të kaluar, ka shënuar rritje prej 4,9 për qind, ndërsa indeksi i çmimeve me pakicë është rritur për 5,2 për qind. Çmimet e produkteve ushqimore bazë po rriten jashtë kontrollit dhe buxhetet familjare janë nën presion të vazhdueshëm. Por kjo nuk është e gjitha, qytetarët tashmë po paguajnë fatura më të larta të energjisë elektrike. Vetëm në janar, ato u rritën nga 20% në 30%, duke përfaqësuar një tjetër goditje të rëndë për standardin e jetesës. Në këto kushte, ku rritja e çmimeve tejkalon rritjen e të ardhurave, gjithnjë e më shumë familje po përballen me vështirësi financiare dhe për shumë njerëz, paga mujore nuk mjafton më as për shpenzimet më elementare. Në vend që qeveria të ndërhyjë dhe të frenojë krizën, ne shohim mosinteresim, zvarritje dhe mungesë të plotë të masave që do të mbrojnë fuqinë blerëse”.
“Sot si opozitë e përgjegjshme propozojmë ndryshime ligjore që do të çojnë në mbrojtjen dhe përmirësimin e standardit të jetesës. Grupi parlamentar i LSDM-së dhe koalicioni kanë dorëzuar Projektligjin për ndryshimin e Ligjit për TVSH-në, me të cilin kërkojmë uljen e taksës së energjisë elektrike nga 18% në 5%, si dhe heqjen e TVSH-së për produktet ushqimore bazë, përkatësisht uljen e saj nga 5% në 0%. Me këto amendamente të propozuara kërkojmë zbatimin sistematik të dy nga shtatë masat ekonomike të LSDM-së”, tha Bytyqi.
Sipas tij, ulja e TVSH-së për energjinë elektrike do të nënkuptojë 13% më të ulëta të faturave, apo më të lirë të energjisë elektrike për mbi 600 mijë amvisëri.
Bytyqi: LSDM propozon ligj për uljen e TVSH-së për energjinë elektrike dhe produktet ushqimore bazë appeared first on Telegrafi.
