Vizita e kryetarit të Këshillit të Bashkimit Evropian, Antonio Costa, në Shkup javën e ardhshme është një tjetër sinjal i fortë për prioritetet e BE-së. Fakti që ai po viziton Ballkanin Perëndimor, që ai po vjen në Shkup, është dëshmi se ne jemi të gatshëm për zgjerim, tha në intervistë për AIM-n ambasadori polak në vend, Mariush Brimora, vendi i të cilit është kryesues aktual me BE-në.
“Nga perspektiva ime, mund të përmend gjithashtu se kryeministri ynë Donald Tusk do të vizitojë Shkupin në muajt e ardhshëm dhe ky do të jetë një tjetër sinjal se ne kujdesemi për Maqedoninë e Veriut, se e mbështesim vendin, se Presidenca, Këshilli i BE-së mbështesin procesin e hapjes së negociatave dhe kjo është një shenjë e fortë se do të presim një përgjigje nga pala e Maqedonisë”, theksoi ambasadori.
Ai thekson se nevojitet vullnet politik, është e nevojshme të përfundojnë reformat në Maqedoninë e Veriut dhe të ruhet entuziazmi për anëtarësim në BE.
“Nevojitet vullnet politik, reformat në Maqedoninë e Veriut duhet të përfundojnë dhe ne duhet të sigurohemi, dua të them politikanët këtu, që ata të mos humbasin mbështetjen nga shoqëria e Maqedonisë për anëtarësimin në BE, sepse ne tashmë e dimë nga anketet e opinionit publik se kjo mbështetje po bie, sepse shoqëria është tashmë e lodhur nga pritja. Prandaj, duhet të jemi shumë të kujdesshëm që të mos humbasim mbështetjen e shoqërisë. Për fat të mirë, hulumtimet e fundit të opinionit publik që u publikuan vetëm pak javë më parë, mendoj se ishin ende në një nivel pak mbi 60 për qind, kështu që duhet ta shfrytëzojmë këtë entuziazëm, thotë ambasadori Brimora në intervistë për AIM-n.
Ai thekson se aktualisht, Komisioni Evropian, Brukseli, Presidenca, të gjithë janë të përgatitur për procesin e zgjerimit.
“Dyert janë të hapura. Ky është një moment shumë i favorshëm për vendet kandidate. Problemet me botën e sotme, paqëndrueshmëria që përmendëm, paparashikueshmëria, çështja është se ky lloj momentumi nuk mund të zgjasë përgjithmonë. Pra, detyra e Qeverisë së Maqedonisë së Veriut është ta shfrytëzojë këtë momentum për sa kohë që zgjat”, thotë Brimora.
Me ambasadorin biseduam për perspektivën evropiane të Maqedonisë, politikën mbrojtëse të BE-së në kontekstin aktual gjeopolitik, për agjendën e reformave të vendit, politikën doganore të Trumpit.
Brimora: Vizita e kryetarit të KE-së në Shkup është sinjal i fortë se BE është e gatshme për zgjerim appeared first on Telegrafi.
