Për të përmbushur kushtet minimale që secila komunë të mund të veprojë siç duhet, është e nevojshme që të punësohen edhe rreth 40 inspektorë të tjerë nëpër komuna, deklaroi sot kryetari i BNJVL-së dhe kryetari i komunës së Kisella Vodës, Orce Georgievski. Kontrollet, theksoi Georgievski, duhet të bëhen kudo dhe këtu të gjitha komunat do të ndihmojnë njëra-tjetrën dhe në periudhën e ardhshme, siç tha, do të bëjnë të gjitha përpjekjet që në secilën komunë të punësohet një inspektor përkatës.
Kjo situatë nuk është e re, tha Georgievski, duke theksuar se komunat edhe më herët kanë bashkëpunuar me njëra-tjetrën sa i përket shërbimeve inspektuese.
“Unë kur u bëra kryetar komune praktikisht nuk kishte asnjë inspektorë, as inspektorë ndërtimi, e as për banim. Në komunën tonë nuk ka funksionuar asnjë lloj inspektimi, qoftë për arsye objektive apo subjektive nuk do të hyj, por bashkëpunimin e parë ndërkomunal e kam krijuar me komunën e Gjorçe Petrovit dhe tani jemi komunë që ndihmon me inspektime në komunat tjera”, tha Georgievski.
Lidhur me kontrollet e objekteve të banimit, Georgievski tha se objektet e vjetra më së shpeshti kanë probleme me rrjetin hidrant, por asgjë nuk zgjidhet brenda natës dhe duhet të fillojmë prej diku.
“Më shpesh nuk kanë pajisje të mjaftueshme, përkatësisht nuk kanë zorrë në hidrantë. Shërbimet tona, në bashkëpunim me DMSH janë udhëzuar që të marrin masa shumë shpejt. Ne do të japim hapësirë për të korrigjuar të gjitha gabimet e së shkuarës, përpara se të kalojmë te ndëshkimi. Gjëja më e lehtë është shqiptimi i dënimit, është më e vështirë të ndryshohet sistemi dhe të vendoset një sistem që qytetarët e kanë merituar për më shumë se tridhjetë vjet”, tha Georgievski.
Secila komunë, sipas Georgievskit, do të duhet të dorëzojë procesverbal për kontrollet e bëra në BNJVL dhe më pas ato do të vihen në dispozicion të opinionit.
BNJVL: Mungojnë rreth 40 inspektorë për çdo komunë që të mund të veprojnë siç duhet appeared first on Telegrafi.