BDI sot ka reaguar në lidhje me punësime e fundit në filialin e Centraleve Elektrike të Maqedonisë së Veriut (CEMV) në Strugë dhe Hidrocentralin në Dibër, ku sipas tyre, është zbatuar një praktikë e papranueshme diskriminimi etnik dhe përjashtimi të shqiptarëve.
“Në filialin “Drini i Zi” në Strugë, janë angazhuar 23 persona me kontrata të përkohshme pune – të gjithë nga komuniteti maqedonas dhe asnjë shqiptar, pavarësisht se shqiptarët përbëjnë një pjesë të konsiderueshme të popullsisë në këtë rajon.
Të njëjtën ditë, në hidrocentralin “Shpilje” në Dibër, janë realizuar 8 punësime të reja – sërish pa përfshirjen e asnjë qytetari shqiptar.
Këto zhvillime dëshmojnë për një model të koordinuar dhe të qëllimshëm të diskriminimit institucional dhe përbëjnë një sulm të drejtpërdrejtë ndaj parimeve të përfaqësimit të drejtë dhe barazisë në punësim, të garantuara me ligj dhe me Kushtetutë.
Edhe më shqetësuese është heshtja dhe bashkëpunimi i heshtur i mbetjeve të VLEN-it në Qeveri, të cilët shohin punësimet monoetnike të VMRO-së, por nuk arrijnë të sigurojnë as një vend pune për popullin që pretendojnë ta përfaqësojnë.
BDI u bën thirrje menjëherë drejtuesve të CEMV-së dhe institucioneve përkatëse që të japin shpjegime publike dhe të ndërmarrin masa urgjente për korrigjimin e kësaj padrejtësie”, thonë nga BDI.
Praktikat e punësimit në ndërmarrjet publike nuk guxojnë të kthehen në mjete të favorizimit etnik dhe klientelizmit partiak./Telegrafi/
BDI: Janë bërë punësime diskriminuese dhe monoetnike në filialin e CEMV-së në Strugë dhe Hidrocentralin në Dibër appeared first on Telegrafi.
