Banka Popullore propozon që qytetarët të kenë të drejtën për katër tërheqje falas në muaj nga bankomatët e bankave të tjera, me vlerë deri në 2.000 denarë për transaksion. Sipas guvernatorit Trajko Slaveski, synimi është të sigurohet qasje më e lehtë në para të gatshme për të gjithë qytetarët, pavarësisht se në cilën bankë kanë llogari. Masa parashikohet të hyjë në fuqi në fillim të vitit 2026.
“Paratë e gatshme do të vazhdojnë të përdoren nga shumica e qytetarëve, edhe pse në sasi më të vogël. Rekomandohet që secili të ketë para të gatshme për nevojat bazë për një periudhë prej të paktën disa ditësh deri në një javë”, tha guvernatori në rrjetin social X, duke shtuar se mbështetësit e parasë fizike theksojnë anonimitetin dhe lirinë që ajo ofron, një qëndrim që, sipas tij, duhet respektuar.
Slaveski vuri në dukje se shpërndarja e bankomatëve në vend është e pabarabartë, ndaj do të ndërmerret iniciativa për krijimin e një rrjeti kombëtar të bankomatëve. Ky rrjet do të bazohet në infrastrukturën ekzistuese të bankave, me plan për zgjerim dhe optimizim, në dobi të qytetarëve dhe vetë bankave.
Sipas planit, rrjeti kombëtar i bankomatëve pritet të jetë plotësisht funksional deri në fund të vitit 2026.
Banka Popullore në RMV propozon katër tërheqje falas në muaj nga bankomatët e bankave të tjera appeared first on Telegrafi.