Këngëtari dhe profesori i muzikës Bajramali Idrizi, është i ftuari i radhës në emisionin “PodGo”, me të cilin kemi diskutuar për maturën, dasmat dhe muzikën në përgjithësi.
Profesori Idrizi tha se maturat ditët e sotme bëhen si dasma dhe është nevoja që ato të ndryshohen. Gjithashtu ai tha se bëhen harxhime të mëdha për mbrëmjen e maturës.
“Në Tetovë jam si profesor gati 28 vite, kam qenë gjithmonë aktiv nëpër matura dhe besoj dhe mendoj se nuk kanë ndryshuar. Disa herë duket se matura bëhet si dasmat. Mendoj se duhet të ndryshojnë, duhet të bëhen në stilin after-party, psh të ketë muzikë me DJ dhe popullore. Duhet të theksojmë se harxhimet janë të jashtëzakonshme brenda një mature. Vitin e fundit bisedohet aq shumë për maturën, saqë lihet anash edhe mësimi. Veshja e të rinjve duhet të jetë modes dhe modern”, tha profesori Idrizi.
Ndërsa sa i përket dasmave, ai tha se ato kanë ndryshuar në krahasim me vitet e mëhershme.
“Dasmat i ndaj në dy kategori, ato me nivel artistik dhe ato nën nivel artistik. Këtu ka të bëjë shumë këngëtari, se çfarë u ofron të pranishmëve. Dasmat kanë ndryshuar, megjithatë ka të bëjë shumë ana profesionale, se çfarë u ofrohet të pranishmëve”, tha profesori.
Kurse sa i përket muzikës dhe studentët në këtë lëmi, ai tha se nuk ka interesim të madh nga të rinjtë për studime.
“Kemi studentë që janë të përkushtuar, por në përgjithësi te të rinjtë ka rënë interesi për studime. Logjika e gjeneratës së re është se nuk ka shumë interesim për të studiuar. Dallimi në mes studentëve tani dhe më herët është shumë i madh. Qëllimi i të rinjve nuk është që të marrin dije, por të fitojnë pasuri sa më shpejt”, tha Bajramali Idrizi.
Ai foli edhe për konkurrencën jolojale në muzikë, ndërsa tha se institucionet shtetërore duhet të ndalojnë këngët që janë pa vlera artistike./Telegrafi/
Bajramali Idrizi në PodGo: Maturat sot bëhen si dasma, harxhimet janë shumë të mëdha appeared first on Telegrafi.
