Emisari special i Bashkimit Evropian për dialogun Kosovë-Serbi, Miroslav Lajçak, ka zbuluar detajet nga takimi me presidentin e Serbisë, Aleksandër Vuçiç. Përmes një postimi në rrjete sociale ai ka theksuar se fokusi i bisedimeve ishte tek takimi i ardhshëm i kryenegociatorëve në Bruksel.
“Pas Prishtinës javën e kaluar, vizitova Beogradin për t’u takuar me presidentin e Serbisë Aleksandër Vuçiç dhe me Petar Petkoviç. Folëm për takimin e ardhshëm të kryenegociatorëve, çështjet aktuale, të cilat duhet të adresohen urgjentisht dhe zbatimin e Marrëveshjes në rrugën drejt normalizimit”, tha Lajçak.
Në lidhje me takimin ka reaguar me herët edhe presidenti Vuçiç, i cili i ka bërë thirrje ndërkombëtarëve të angazhohen për të mbrojtur popullin serb në Kosovë.
“Shqyrtuam mundësitë dhe temat për vazhdimin e bisedimeve konstruktive në Bruksel, si dhe hapat e nevojshëm për progres drejt normalizimit të marrëdhënieve ndërmjet Beogradit e Prishtinës. Sërish i bëra thirrje komunitetit ndërkombëtar te angazhohet në mënyrë të vendosur në çështjet me rëndësi themelore për mbijetesën e popullit serb në Kosovë dhe për stabilitetin rajonal”, tha Vuçiç.
Edhe i dërguari i SHBA-ve, Gabriel Escobar më herët ka nënvizuar vështirësitë e hasura në bisedime për zgjidhjen e krizës së shkaktuar nga çështja e dinarit. Diplomati amerikan dështoi në vizitën e fundit në Prishtinë për të bindur Albin Kurtin të bënte një hap pas. /vizionplus.tv
