Një aksident tragjik ka ndodhur ditën e sotme në një autostradë në Rumaninë Perëndimore.
Shtatë tifozë të PAOK-ut, të moshës 28-30 vjeç, që udhëtonin për në Francë kanë humbur jetën pas përplasjes së furgonit me të cilin ata udhëtonin me një kamion.
Siç duket në video, furgoni me të cilin udhëtonin u përplas ballë për ballë me një kamion pas një manovre të rrezikshme parakalimi.
Ambasada greke në Bukuresht konfirmoi numrin e viktimave dhe dërgoi një ekip në vendngjarje.
Tre persona gjithashtu kanë mbetur të plagosur. Sipas mediave greke, dy prej tyre janë në gjendje të rëndë.
Kryeministri i Greqisë, Kyriakos Mitsotakis ka shprehur ngushëllimet të afërmve te viktimave.
“U trondita thellësisht kur mësova për aksidentin tragjik në Rumani që mori jetën e 7 bashkatdhetarëve tanë të rinj. Qeveria greke dhe Ambasada jonë janë në bashkëpunim të drejtpërdrejtë me autoritetet lokale, duke ofruar të gjithë mbështetjen e mundshme. Në këto kohë të vështira, së bashku me të gjithë grekët, shpreh ngushëllimet e mia më të sinqerta për të afërmit e viktimave dhe familjen PAOK. Me dëshirën e përbashkët që të plagosurit të shërohen shpejt. Mendimet tona janë me ta”, shkruan ai.
