Një gjurmë dore 4000-vjeçare ka emocionuar egjiptologët britanikë që kur u zbulua aksidentalisht në një objekt argjile në një varr të Egjiptit të Lashtë. Studiuesit në Muzeun Fitzwilliam në Universitetin e Kembrixhit bënë një zbulim të papritur teksa përgatiteshin për një ekspozitë që do të hapet në vjeshtë.
Gjurma e një dore të plotë, që i atribuohet krijuesit të objektit, u gjet në bazën e një “shtëpie shpirtërore”. Ajo është një shëmbëlltyrë prej balte në formën e një ndërtese, e vendosur në varre dhe që besohet se ofron strehim për shpirtin e të ndjerit.
Sipas ekspertëve, “aksidenti” ka të ngjarë të ketë ndodhur kur mjeshtri po e lëvizte modelin me duart e tij, ndërsa balta ishte ende e lagur, përpara se të vendosej në furrë.
Një analizë e detajuar zbuloi se objekti daton që nga viti 2055–1650 p.e.s. Mjeshtri fillimisht krijoi skeletin e ndërtesës dykatëshe nga shufra druri, të cilat më pas i mbuloi me argjilë. Gjatë pjekjes, druri u dogj, duke lënë pas vetëm guaskën prej argjile.
“Shpesh gjejmë gjurmë gishtash në llak ose në arkivole, por është e rrallë dhe emocionuese të gjesh një gjurmë të plotë dore si kjo”, – tha Helen Strudwick, krye-egjiptologia e muzeut dhe kuratore e ekspozitës.
“Kjo gjurmë i përket mjeshtrit që e preku atë para se balta të thahej. Nuk kam parë kurrë një gjurmë dore kaq të qartë në një objekt egjiptian. Mund ta imagjinoni pothuajse njeriun që e bëri atë, në momentin që e merr për ta çuar jashtë që të thahet” – tha ajo.
Ekspozita e re e titulluar “Made in Ancient Egypt” do të hapet më 3 tetor dhe përpiqet të hedhë dritë mbi historitë e artizanëve që fshihen pas gjetjeve arkeologjike, të cilat shpesh anashkalohen në rrëfimin historik. ©CNN, LAPSI.al
Zbulohet një gjurmë dore 4000-vjeçare në një varr në Egjipt appeared first on Lapsi.al.
