Pas dy ditë negociatash në Doha, Hamasi emëroi Yahya Sinwar si kreun e ri të krahut të tij politik, duke zëvendësuar Ismail Haniya, i cili u vra në Teheran javën e kaluar.
Sinwar, lideri i Hamasit në Gaza që prej vitit 2017, është konsideruar prej kohësh si “kryeministri” i strategjisë ushtarake të organizatës në rajon, ndërsa ai karakterizohet si një nga “ arkitektët” e sulmit të Hamasit ndaj Izraelit më 7 tetor.
Ai është cilësuar si “terrorist” nga Bashkimi Evropian, emri i tij është shtuar në listën përkatëse të terroristëve nga SHBA në 2015, ndërkohë që Britania ka vendosur tashmë një sërë sanksionesh kundër tij, si dhe për zyrtarë të tjerë të lartë të Hamasit.
Prokurori i Gjykatës Penale të Hagës ka lëshuar gjithashtu një urdhër arresti për të, së bashku me Benjamin Netanyahu dhe ministrin izraelit të Mbrojtjes Yoav Gallad për krime lufte dhe krime kundër njerëzimit lidhur me luftën në Rripin e Gazës.
Zgjedhja për të udhëhequr krahun politik të Hamasit vjen në pritje të hakmarrjes nga Irani në përgjigje të vrasjeve të Haniya dhe komandantit të Hezbollahut, Fuad Shukr.
I lindur në qytetin jugor të Gazës, Khan Younis, Sinwar iu bashkua Hamasit në vitet 1980. Ai u burgos më vonë për vrasjen e palestinezëve të akuzuar për apostazi ose bashkëpunim me Izraelin, duke kaluar më shumë se dy dekada në një burg izraelit. Ai u lirua në vitin 2011, së bashku me më shumë se 1000 të burgosur të tjerë palestinezë, në një shkëmbim të burgosurish në këmbim të një ushtari të vetëm izraelit të mbajtur nga Hamasi.
Siç raportohet nga New York Times, Sinuar e dinte Kuranin përmendsh. Gjatë burgimit, ai shkroi gjithashtu një roman të quajtur Gjembi dhe Karafili, një histori e moshës madhore që përshkruan jetën e tij: Tregimtari, një djalë nga Gaza i quajtur Ahmed, del nga streha gjatë luftës arabo-izraelite të vitit 1967 dhe jeton pushtimin izraelit, që, siç shkruante në libër, i bën “kraharorët e të rinjve të ziejnë si kazan”.
Një herë ai i tha një gazetari italian se “burgu të ndërton” dhe se i dha kohë të mendonte se çfarë besonte dhe çmimin që do të ishte i gatshëm të paguante për të.
Një zëdhënës i Hamasit tha në një intervistë për Al Jazeera se Sinwar u zgjodh unanimisht dhe se ai “është i pranuar nga të gjithë në organizatë”. Ai shtoi se ishte shumë herët për të diskutuar sesi zgjedhja e tij do të ndikonte në bisedimet e armëpushimit, por la të kuptohet se pak do të ndryshonte.
Një raport i NYTimes thotë se qëndrimi i tij i linjës së ashpër sugjeron se ai nuk do të jetë i gatshëm të arrijë një marrëveshje armëpushimi me Izraelin që do t’i jepte fund luftimeve në Gaza dhe do të çonte në kthimin e rreth 115 pengjeve.
Sipas të njëjtit botim, oficerët e inteligjencës izraelite dhe amerikane besojnë se strategjia e Sinwar është të vazhdojë luftën në Gaza për aq kohë sa të jetë e nevojshme për të dëmtuar reputacionin ndërkombëtar të Izraelit dhe për të dëmtuar marrëdhëniet e tij me aleatin e tij kryesor, SHBA-në.
Israel Katz , ministri i jashtëm i Izraelit, tha në një deklaratë se emërimi i Sinwar është “një tjetër arsye bindëse për ta shfarosur atë shpejt dhe për të fshirë këtë organizatë të ndyrë nga faqja e dheut”./vizionplus.tv
