Të paktën pesë civilë u vranë sot në pjesën lindore të Republikës Demokratike të Kongos, në një tjetër sulm që i atribuohet rebelëve të Forcave Demokratike Aleate, të cilët janë zotuar për besnikëri ndaj grupit xhihadist të Shtetit Islamik.
“Unë pashë me sytë e mi pesë kufoma”, tha një banor i fshatit Mamove për AFP pas sulmit që ndodhi në këtë zonë të provincës Kivu Veriore.
ADF përbëhej kryesisht nga rebelë myslimanë nga Uganda dhe që nga mesi i viteve 1990 ka shkatërruar provincat lindore të DR Kongos, duke vrarë mijëra civilë. Në vitin 2019, ata u zotuan për besnikëri ndaj Shtetit Islamik, i cili që atëherë ka marrë përgjegjësinë për disa sulme të ADF.
Në vitin 2021, Kampala dhe Kinshasa filluan operacione të përbashkëta ushtarake për të dëbuar rebelët e ADF nga bastionet e tyre në Republikën Demokratike të Kongos. Megjithatë, deri më sot ata nuk kanë mundur t’i japin fund sulmeve të tyre.
Muajin e kaluar rreth 150 civilë u vranë në provincën Kivu Veriore të Republikës Demokratike të Kongos në sulmet që i atribuohen xhihadistëve të ADF./vizionplus.tv
