Presidenti i Shteteve të Bashkuara, Donald Trump, njoftoi të enjten se një “samit historik paqeje” do të mbahet sot në Uashington, me pjesëmarrjen e tij, presidentit të Azerbajxhanit Ilham Aliyev dhe kryeministrit të Armenisë Nikol Pashinyan. Dy vendet kanë qenë në konflikt për dekada për territoret e diskutueshme.
Përmes një postimi në rrjetin e tij social Truth Social, Presidenti Trump deklaroi se shumë liderë kanë tentuar më parë t’i japin fund këtij konflikti, por pa sukses “derisa tani është arritur, falë TRUMP”, shkroi ai, duke iu referuar vetes në vetën e tretë dhe duke e shkruar mbiemrin e tij me shkronja të mëdha.
Trump bëri të ditur se do të organizojë një “ceremoni nënshkrimi paqeje” në Shtëpinë e Bardhë, ku fillimisht do të mirëpresë veçmas udhëheqësit armen dhe azerbajxhanas. Më pas, do të firmosen marrëveshje dypalëshe SHBA–Azerbajxhan dhe SHBA–Armeni, përpara nënshkrimit të një marrëveshjeje trepalëshe, e cila është planifikuar të zhvillohet në orën 16:15 (sipas orës lokale në Uashington, 23:14 me orën greke).
Sipas rrjetit televiziv CBS, marrëveshja përfshin edhe ndërtimin e një korridori prej 43 kilometrash në territorin armen, që do të quhet “Rruga Trump për Paqe dhe Prosperitet Ndërkombëtar” (TRIPP). Shtëpia e Bardhë nuk ka komentuar ende mbi këto detaje.
Ndërkohë, qeveria armene konfirmoi se Kryeministri Pashinyan do të zhvillojë bisedime me Presidentin Trump për forcimin e partneritetit strategjik mes Armenisë dhe SHBA-së. Ajo njoftoi gjithashtu se samiti trepalësh synon të kontribuojë në paqe, integrim dhe bashkëpunim ekonomik në rajon.
/vizionplus.tv
