Byroja Kombëtare Kundër Korrupsionit të Ukrainës (NABU) ka hapur një hetim ndaj Timur Midych, një bashkëpunëtor i afërt i presidentit Volodymyr Zelensky, lidhur me një çështje të dyshuar korrupsioni që kap vlerën e 100 milionë dollarëve në sektorin e energjisë.
Sipas mediave ukrainase, hetimi përfshin kompaninë shtetërore të energjisë bërthamore “Energoatom”, e cila dyshohet se ka marrë ryshfete prej 10 deri në 15% nga kontraktorë privatë në shkëmbim të kontratave të majme. Deri më tani, shtatë persona janë vendosur nën hetim, ndërsa priten edhe arrestime të tjera.
NABU ka zhvilluar bastisje në banesën dhe zyrat e Midych më 10 nëntor, por sipas raportimeve mediatike, ai kishte braktisur vendin pak orë përpara nisjes së operacionit.
Timur Midych, ish-partner biznesi dhe bashkëpronar i kompanisë së prodhimit të filmave dhe humorit “Kvartal 95”, e themeluar nga vetë Zelensky, dyshohet se ka përfituar nga lidhjet me pushtetin për të siguruar kontrata në sektorët e energjisë dhe mbrojtjes, përfshirë kompani të prodhimit të dronëve. Mediat ukrainase e përshkruajnë atë si një “oligark de facto”, me ndikim të madh në ekonominë dhe politikën e vendit.
Çështja ka shkaktuar reagime të forta politike, veçanërisht nga opozita e udhëhequr nga Petro Poroshenko, e cila ka kërkuar dorëheqjen e qeverisë, duke e akuzuar për mungesë transparence dhe keqpërdorim të pushtetit në një periudhë të ndjeshme për vendin, që prej tre vitesh ndodhet në luftë me Rusinë.
Ky është rasti i dytë ku emri i presidentit Zelensky lidhet me çështje të ndjeshme korrupsioni. Në fillim të vitit 2025, ai u kritikua ashpër për përpjekjen për të vendosur NABU-në nën kontroll të drejtpërdrejtë të qeverisë, përmes një projektligji që u tërhoq pas protestave më të mëdha antiqeveritare që nga nisja e luftës.
NABU ka konfirmuar se po bashkëpunon me partnerë ndërkombëtarë për të hetuar rrjetin e korrupsionit që përfshin sektorë strategjikë të ekonomisë ukrainase, ndërsa autoritetet kanë paralajmëruar se hetimet do të zgjerohen në javët në vijim./vizionplus.tv
